朋友，如果最近你買衫的要求變成了以下這些，I’m sorry (or I’m so happy)，你老了！
5KG外套的啟示
聖誕去日本玩，把某件6月已經買下的軍裝絨大衣放進行李篋，因為香港一直未凍過， 所有時裝店的winter sale都減盡減絕了，這件衣服再不穿都要過季啦……不如這樣說，這些年來一直揀嚴寒之地作冬季旅行，都只是因為漂亮的「厚衫」買太多，若不出國，香港能穿的日子一年只有三日吧！
歡歡喜喜把大褸從衣櫃摘下，但在運輸往行李篋途中的第三步已決定u-turn! 頂，靚就靚啦，但咁重點著呀？起碼有5公斤呀大佬！ 玩吓手唔止！
先不要說航空公司寄運的重量限制，就算夠quota，咁重你又會唔會著先？我們這個年紀，咁樣一件褸著足一日夜晚真係要去揼骨揼返兩粒鐘先得！入到室內逛街拎住又係煩，慘過舉重。
其實呢件褸十一月去美國同九月去韓國時都想過帶去，因為同樣原因結果都係收返入衣帽間。
然後猛然醒起，近一兩年添置冬季外套的考慮條件，已偷偷加入了「要輕」而不太自覺，就算你靚到曉飛，一著上身腰酸背痛，即刻放底走人，頭也不回，這就是「上咗年紀」 的意思吧，年輕時只要好樣，五噸重又何妨？ 一件釘滿珠片的絨大褸，一樣當正佢薄如蟬翼 輕於鴻毛著住周街行！「買褸要輕」？腦裏面從來未出現過呢個concept ! 聽老人家講聽完都唔明佢噏乜春……
直到有一日你去旅行逛逛吓街，突然好嬲自己做乜搵自己笨，好揀唔揀揀件感覺重過你本人嘅厚絨長軍褸（仲有夾棉lining）嚟著，就在那神奇的一秒鐘，一切都改變了，你正式加入了好像不久之前仍然覺得遙不可及的「老人家」行列！
就在那一刻，你阿爺阿嫲太公太婆在會所門口熱烈歡迎你，齊聲：「Welcome to the club！」
老人購物須知
然後你會問，明知自己都進入了「買衫老虎蟹都一定要輕」的年紀，為什麼還自作自受攞苦嚟辛買件五公斤重嘅 jacket 唧？
冤枉大老爺！
自以為已經是自學成功的網購專家的我，每次上網買衫都精心研究每件衫的材料、細節，那張圖能放多大就放多大，每個 measurement table 保證驗屍咁驗，雖然話就話可以免費退貨，但始終寄來寄去又填表又包返，都係煩㗎，所以呢，總之呢，我估我自己都算上網買嘢買得相當叻啦吓！點知嗰啲網 站，幾高級幾好服務都好，平時係唔會仔細到秤一秤件衫然後將個net weight放埋上個網頁度嘅，咁我買咗拆箱果陣，一時間又醒唔起逗一逗件褸重唔重喎，結果咪……
也許以後那些 e-shop，如果想我做埋老人（及年輕但怕褸重的人）的生意，不妨提供埋衣服「淨重」的資料，才算體貼入微，才夠耆英 friendly ! 至少 friend 到我先！
話時話，佢哋其實可以請我做 consultant， 因為不認不認還需認，在下都到了那個年紀， 對「初老者的需要」都被迫有研究了。
作為一個「有返咁上下」的時裝精，我發現不再年輕的人，在衣服打扮上，漸漸會咬實兩點唔放，「要舒服」和「要方便」！一如每個人漸漸就會出現「見櫈就坐」「好近都坐車」「有嘢唔想拎」等等自然現象。
著衫「要舒服」和「要方便」聽起來很老生常談，但實戰起來還是有點竅妙的，我們下回繼續談。
（下期續）
