挑戰來了！
我要去西班牙！
所以我要「唔靚」！目的地是出名治安不好的Madrid，我知道那些光天化日的偷與搶不是被誇張抹黑的，因為你身邊10個去過這個城市或Barcelona玩的朋友，起碼有兩三個（在已經有戒心的情況下）有狠狠地瀨過嘢，他們一定可以出來做證人，對，不是他們「有個friend」那種其實找不到實據只靠傳吓傳吓的流言，而是你那些朋友自己可以現身說法，如果那個苦主並不正正就是你本人那麼不幸的話。
所以你知道，去西班牙玩，一定要「著唔靚啲」，稍為戴隻像樣點的手錶，或者拿個光鮮點的手袋出街，就已等於大庭廣眾高聲呼叫「掠我啦！唔鋸我就笨啦喂！」
然而，為了安全，你又俾自己有幾「唔靚」先？
窮得風流
本文見街之日，我應早已遊完西班牙，希望我無事無幹啦！
但寫的時候正在執行李，點執好呢？簡單來講，我其實是個在香港不喜歡「扮靚」去旅行才有心情扮的人，原因有幾個：一、在香港工作上已有足夠扮靚機會，休班時就想relax啲以茲分別，但平時其實都買落唔少衫，放着不穿白白過季也可惜，於是放假趁心情好都不介意打扮一下，順便燃燒一下衣服存貨。二、不工作時的大部份時候，在家中工作的我，有時一整天就只出門一會兒，通常是晚上出街吃個飯就回去，意思就是一落街就坐車去那幾家吃慣吃熟的餐廳，只是點對點的移動而絕不逛額外的街，很多時真的只是door to door往返，途中見到的人不出二十 個，扮咁靚也是無乜人見到嘥料，怎似在外地一早躝街躝到晚咁「抵」，著靚啲都有人 觀看？
所以我有點苦惱的是，明明放假出trip是我生活中少數的扮靚機會，如今為防歹徒見獵心起，還要故意在西班牙扮唔靚，也是有點沒趣。
最後我們同行幾個朋友想出了一個「苦中作樂」的styling遊戲，就是比賽誰可以在馬德里的幾天中，穿得不光鮮不體面不名貴不顯眼，卻仍然可以窮得有型，這種「寒酸得嚟有格」的造型，對於我們這幾個都在職場上打拚了幾十年，現在算是不用憂柴憂米兼有丁點兒餘錢鬆動的初老年人來說，都有點「好遠了」，但年輕時家境不寬裕孭個背囊的窮遊日子我們還是記得的，反而可以藉着今次罪惡城之旅懷念一下呢！
重點是這班算安逸慣享受慣的人，能忍得住自己多唔靚呢？又或者說，生活品味好不容易算培養出來了，又真的能收放自如地真的可以在一堆衫中揀最唔靚個幾件出來著（而又唔會週身唔聚財）嗎？
真是越講越期待了。
意想不到的逆轉
想不到還未出發考驗就來了。
前兩天還想着如何可以穿得「波希米亞」一點去西班牙，想得甚至有點陶醉之際， 恰巧約了個老友喝茶，之後她應承了要陪女兒去買新衣服過年，由於我對「現在十一至十五歲的女孩到底流行穿什麼衣服和去哪裏買衫？」這個題目很感興趣，便主動跟了去見識一下。
那家紅透全美國的少女服飾連鎖店開在中環最貴大型商場之一，說來失禮，品牌名字自命衫癡如我也「聽都未聽過」，於是做了點事前research，嘩，IG followers有近4M ！
進了那個店即場便嚇死我！我知道我以下說的話會很顯老，而且極有可能被開口半中半英和全英的少女們取笑甚至攻擊，但我也不得不忠於自己告訴大家：我完全唔乸明點解有人會覺得呢種衫靚。
OK，我覺得我喺時裝上算open嘅，接受到好多人不同的品味和style，自己唔覺得靚的都可以理解為什麼有人會覺得靚。比如大部份時下女性teenagers最常見的超短齊B爛牛仔褲和有嘢無嘢都拉低個膊的恤衫／ tee ／ knitwear都能看出一點美態，但最最最新近呢一波我就真係理解不能。
簡單來說，為什麼現在的少女們會鍾意著啲阿伯衫呢，不只是任何阿伯咁簡單，是那些60歲以上仍為口奔馳，家境比較不容易的自食其力阿伯，例如是做看更的、揸的士的、返工廠的，我絕無不尊敬這些勞苦功高地為人羣服務、於是搞到自己無時間無心機無 budget打扮的叔叔伯伯們，我只是不明白為 什麼妙齡少女要著他們返工時為求保暖不為美觀的無款夾棉夾克才叫潮才叫有型？
讓我從一般人認為足以令一件靚衫稱之為靚的各種方面條件來評論一下吧！首先 「款式」呢，是沒有款式的，是最basic經 典的設計， 一點twist甚至details都沒有； 「剪裁」沒有為少女而改良，而且外套全部 one size only；「用料」和「造功」也是最cheap的material和最無厘神氣的縫功， 連那些扣子拉鏈都是遠遠就能一眼看穿是 「渣嘢」；「配搭」更是零配搭，連品牌大會catalogue入面的”styling”相都是亂襯的， 顏色布料形狀為什麼放在一起全沒邏輯…… 有些衫我們會說「我們普通人不可能穿出味道型格，必須要體態／面容／氣質都超越常人的supermodel才能起死回生」，但這個 牌子的少女服我會說，連supermodel著住都核突。
回家後我想了很久，到底是我老了無法理解年輕人的審美呢？還是真的有樣東西 叫「禮樂崩壞」？
正在擔心去西班牙時忍不住「唔靚」 的我，豁然開朗，因為不用擔心自己頂唔順 「唔靚」，「唔靚」已經自己找上門了！終於有一日，無論你頂唔頂得順，我們都要手牽手一齊被迫「唔靚」了！
立此存照，我哋一齊放長雙眼睇吓佢點收科！
