「過年前我明明提過你要買口罩，你卻偏偏不去，要是你一早聽我說，不就沒事了？你總是這樣，當我講嘢係耳邊風。」那你自己又不去買？「我那時候很忙啊，你去藥房時順便買不是更方便嗎？」你仲好意思叫我順便，過年前我要買那麼多食材，還要買漂白水大掃除，你知道那些東西加起來有多重嗎？你從來都不幫手打理家務，只得我一個人做晒已經周身唔得閒，你仲想我幫你順手買口罩？「就係因為我知道果時仲有貨，我先叫你去買啊！果時連我媽都識得買定三四盒看門口，你睇宜家排隊排到嚟呢度，排到我哋都唔知賣晒未。」咁唔通你唔排啊？每個人限買一盒咋，無得叫我幫你買埋啊。「我宜家咪喺度同你一齊排緊囉！」
你以為我真係唔緊張咩，我琴日去完我媽度，已經行晒果邊三十幾間藥房、超市、萬寧屈臣氏，有一半藥房都未開市，另一半已經喺門口大大張紙寫明「口罩沽清」，個個行入去未開口問，藥房職員已經話火酒、酒精棉片、酒精搓手液全部賣晒啦。「原來果邊咁多藥房㗎？」香港地，有邊度唔多藥房啊。「又係。」超市也是這樣，每個人一進門就直接去乾貨區，消毒濕紙巾、洗手梘液、滴露噴霧，連漂白水和維他命C都被掃光，打風一般。米和公仔麵也很多人搶購。「真是恐怖。」SARS那時也許也是這樣吧，我媽說，那時很多人聽了大陸的謠言，去搶購食鹽、白醋、板藍根來治SARS，像喪屍一樣。「那些東西一點都無用，只有戴口罩、勤洗手等科學化的方法，才能預防經飛沫傳染的病。」就是嘛。香港哪有人不知道這種道理呢。
「現在都不知道口罩賣到幾多錢一盒。過年前我媽還買到原價五十蚊一盒五十個，通過BFE和PFE測試的獨立包裝口罩，雖然都是中國製、也沒有通過VFE測試，但都沒辦法了。」講定先，一陣排得到，你可以接受咩價位？「一般炒到幾貴？」上網見到有人話，旺角有藥房賣到五百蚊定一千蚊一盒。「有無咁誇張啊？」人哋話佢哋好過去搶，店員仲好串嘴咁問：咁錢緊要定命緊要啊？「有無搞錯啊，發國難財，有無人性㗎。」有些藥房沒有把價錢抬得那麼高，但也標至一、二百元一盒。「我覺得如果三百五十元一盒，我也會買。」可是就算我們一人買了一盒五十個，離家在外每天更換兩至三個，一個月之內就會用完了啊。「都係。」反正還要排隊等很久，我們上網問問朋友哪裏還有口罩賣吧。
「其實呢，有人剛去過日本，說買了很多盒口罩，可以分一盒給我。」咁好？邊個嚟㗎？”Rebecca。”Rebecca？！「咁佢做空姐，成日幫人代購嘛。」我知啊，上次明知我已經同咗你一齊，喺聖誕party仲著到鬼死咁姣走嚟你度黐身黐勢果個八婆吖嘛！「咁你又唔好咁話佢，佢宜家想幫我哋啊。」擺明想搵個藉口叫你去見佢之嘛！「都唔一定嘅。」宜家咁嘅時勢，有口罩唔留番俾自己用，仲主動問個ex要唔要？會唔會咁好心啊？擺到明對你有企圖啦！「呃……」你唔係仲對佢有嘢啊？「咩啊黐線，無啊！」無嘢你做乜無啦啦會知道佢去完日本？「大姐，宜家喺香港連希特拉都買唔到口罩啊，明知有人成日去外國都唔問吓？」……咁點啊宜家，你係咪想去見佢拎口罩啊？「咁唔通唔要啊？」你照俾番錢佢啊，我唔准你欠果條八婆人情。「咁梗係啦。」你最好用貴過原價同佢買㖭啊，車錢都俾埋佢啊，我要你兩個無拖無欠。「點有得咁計啊，宜家就算有錢都買唔到日本口罩啦，網上啲人話海關扣起外國網店寄嚟香港嘅口罩，話政府禁止入口啊，要人親自帶過關先入到嚟啊。」唉，我都見到呢個消息。「最多我擔保，我見完佢、交收完就走，連地鐵閘口都唔出啦。」哼。你俾佢掂到要即刻洗手㖭啊。「有無咁誇張啊，無咁易感染嘅。」我夠知啦！我唔鍾意佢摸蝕你咋！以前仲摸唔夠啊！
隔周刊出
