由七十年代初一間觀塘的街邊茶檔，發展至今擁有灣仔自置地舖，「周記茶餐廳」一直由「周老闆」周新都主持大局，數十年來堅守着這個言論自由、開放討論的空間（即使有時他亦因發表意見而被茶客羣起而攻之）。
過去數十年，多少天下事，在周記茶餐廳，盡付笑談中。坐在茶餐廳不同角落的人物，那麼陌生卻又那麼熟悉，每天於生命中擦身而過，相遇相知，是他，也是你和我。
周新都（金剛飾演）
暱稱：周老闆、都仔、肥佬周（輝仔專用）、哥哥（阿紅專用）。
簡介：周記茶餐廳話事人，聲大夾惡但富正義感，居於灣仔某大廈十八樓C座。
口頭禪：「你都黐筋嘅！」
祥嫂（朱雪梅飾演）
暱稱：後欄王后、懵婆（周老闆專用）。
簡介：周記茶餐廳雜工，個性無知直率，但樂於助人。
口頭禪：「我唔係懵婆呀！」
三姑 / 周紅（陳慕賢一人分飾兩角）
暱稱：無牙婆、Maria / 阿紅、紅姐。
簡介：心地善良佛教徒，吃齋多年 / 內地新移民，周老闆之契妹，阮南安之妻。
口頭禪：「我老嘢話……」/ 「哼，激死人呀！」
大編輯 / 阮南安 / 孤寒鐸（李錦一人分飾三角）
暱稱：寫稿佬（周老闆專用） / 越南仔 / 阿鐸、鐸叔。
簡介：報章編輯，為人正直，見多識廣 / 偷渡來港的越南船民，周紅之夫，曾靠賣私煙致富 / 周記六十多歲散工，自認知書識禮，但為人縮骨孤寒。
口頭禪：「喂喂，大佬呀……」（鐸）
的土高（何文光飾演）
暱稱：的士佬、揸車佬（周老闆專用）。
簡介：的士司機，喜歡賭馬刨馬經，有一讀幼稚園的女兒。
口頭禪：「哈，就係咁簡單！」
鄭麗美 / 孖七（伍甄琪一人分飾兩角）
暱稱：精甩尾 /七師傅
簡介：地產經紀，昔日角色胡伯通之徒弟，喜歡去日本旅行 / 內地來港按摩師，周紅的「姊妹」。
口頭禪：「Common sense啦！」（美）
輝仔（陳聰飾演）
暱稱：大學生（周老闆專用）、廢青（周紅專用）。
簡介：喜愛打機、一直無法畢業的大學生，常與周老闆、周紅頂嘴。
口頭禪：「嗱，是咁的……」
假如……我係……
如果有得交換角色，《十八樓C座》的演員最想做哪一位街坊？
金剛：我要做大編輯！
做大編輯好，因為可以吹水唔抹嘴，講乜都得，舢舨充炮艇都仲得！
朱雪梅：我要做三姑！
我好羨慕三姑，有個老嘢，乜嘢都教佢，我懵婆唔識嘢㗎嘛，有個人教吓幾好呀。
陳慕賢：我要做祥嫂！
做祥嫂好易做啫，戇戇居居，成日俾人鬧，做人好似祥嫂乜都唔識咁就最好。
李錦：我要做男版七師傅！
男版七師傅正呀，仲要係盲公嚟，演嗰時隻手可以有動作，幾過癮！（但廣播劇冇畫面㗎喎……）咪用聲音表達囉！啊〜巧詩伏呀〜最好係女賓啦。
何文光：我要做多仔公！
多仔公呢個角色最得意，咸咸濕濕，又要扮老聲，好有發揮㗎。
伍甄琪：我要做女版孤寒鐸！
我第一日入《十八樓》劇組，返去同屋企人講，我老竇問我仲有冇孤寒鐸呢個角色，原來佢後生做裝修嗰陣都有聽《十八樓》。
陳聰：我要做周老闆！
因為我相信除咗輝仔之外冇人夠膽寫呢個名，輝仔嘅存在就係為咗窒肥佬，依家我做佢，就可以敲返佢個頭！
*鳴謝美都餐室及大安茶冰廳提供拍攝場地
