第一眼看到唐啟灃（Kevin）會以為他是比較有時尚品味的地產經紀，才27歲的他西裝筆挺，還別上了好看的襟章，很難聯想到他是位作家。（作家也有時尚的啦！拜托）
Kevin打扮成熟，但談吐是個典型90後，不會正經八百。他的笑容很「治癒系」，文字也一樣，著作屬心靈勵志類別，我敢肯定中學生閱讀他的《別怕不一樣》，一定默唸「係呀係呀我係咁」連連。這是他的第二部作品，前作《逃學到美國》寫自己在彼邦當交換生及旅遊的經歷，是上年度「最受中學生歡迎十本好書」之一。
學生夢想「能上車」
《別》多寫青春期的迷失與掙扎，觸及校園欺凌話題，有散文，也有小故事。「本書好大程度啟發自同學仔，我呢兩年成日去中學講講座，發現今時今日嘅學生唔開心，佢哋有呢個年紀唔應該有嘅困惑。」如果人生注定是一場賽跑，大部分香港人應該都想跑向一架「車」，然後竭力擠上去，連莘莘學子都不例外。「我問佢哋呢一刻最想做乜，佢哋會答『儲錢買樓』、『上車囉』。」人生不應只得上車一途吧？如斯「實際」的夢想，在發達城市，可真舉世罕見。
Kevin到校分享，想告訴學生人生不必隨波逐流。「問心講講座好攰，好花精神。試過八點幾要到天水圍，我五點就要起身。但有得講我都盡量講，因為我好想我十幾歲時有人同我講『It ’s ok to be different，你行唔到主流嘅路唔緊要，你仍然可以追尋夢想。」大道固然好走，誰說小徑不能柳暗花明有前景？如果當日有人跟他說非主流也無不可，或許他可以少走冤枉路。
Kevin中學唸商科，大學「順理成章」讀市場營銷。喜歡寫作，最終卻沒選文學相關學系。「屋企人、老師會提醒要穩陣，自己又會去詮釋佢哋嘅期望。我去講座都好鍾意講『被選擇』，我哋總係無勇氣揀一個唔同嘅選擇，唔夠薑反抗。」別人的聲音影響你，但內心否定自己那把聲，才最響。
《別怕不一樣》分為七大章，包括〈討厭自己〉、〈改變自己〉、〈迭失自己〉、〈傷害自己〉、〈認識自己〉、〈做回自己〉及〈喜歡自己〉。他認為這是人生進程，有人可能一直在第一階段；有人萬水千山由第四走到第五；有人從苦海登岸抵達第七。
回首低落的自我形象
寫作時他逼自己回望中學時期所經歷的幾個階段，尤其從討厭到迷失。「求學時期大家講嘢都不負責任，尤其因為外型俾好多tag你。我讀傳統男校，你睇我就知我唔係做運動嗰種，我好想fit in，但你係圓形永遠唔會塞到入個正方形盒。」為寫出當時的感受，他硬着頭皮回首過去。對於「討厭自己」的狀態，他描繪得仔細，也佔書中很多篇幅。「我開頭好down，人生總有啲事係你唔想回望，仲要挖出來放大200倍去形容，但文字無情緒又感染唔到人。」
求學時期，相信學生十居其九都曾覺得自己與人格格不入。「你同人唔一樣嘅部分，一定會令你好厭棄，令你好想切割，但你嘅唔同可能有一日令你shine。要好好珍惜你嘅唔一樣。」他的話讓我想到最近添布頓執導的真人版《小飛象》（Dumbo）。Dumbo有對大大耳朵，因外型怪誕遭人嘲笑，甚至唾棄，馬戲團用布掩蓋牠的大耳朵，只有照顧牠的小朋友細心發現牠能用大耳朵飛翔。擁抱自己的獨特性，自我欣賞，「異能」終會有所發揮。
要從討厭到喜歡，由一極走至另一極，難過登天吧！他說出版了《別》一書，他真的開始「喜歡自己」。「本書令我更認識自己，我搵到我嘅崗位。我用文字安撫到人。雖然我未必能改變到社會，但可能啟發到人，已經令我好滿足。」
追夢不該有門檻
香港不是一個讓人發夢的地方，更何況有些人命途多舛，自小已要受苦受難，跟這群學生談夢想，猶像癡人說夢。「我去過一間女子寄宿學校分享，感受好深。一去到閘口見到一個女仔，佢大叫『我唔入去呀，裏面啲人癲㗎，我無病』。後來先知嗰度嘅學生犯過事、有精神病或無父無母。我回家後不斷諗對佢哋講夢想係咪好離地？佢哋連一年後會點樣都未知。」他慢慢想通了，縱使他不能改變學生的命運，卻只少能給一點光。「不負責任嘅大人攞走咗佢哋嘅希望，我想佢哋知道自己值得有夢想。」他憶起當天有個妹妹裝作「大家姐」嚇唬他，行為顯出她內心傷痕纍纍。「佢話如果我個講座講得唔好，『我個袋有把鎅刀，會統落你度』。好明顯係個受過好多傷，想保護自己嘅小朋友。我真係改變唔到啲乜，只能緊守崗位。」
當學校或者社會都要求人要「正面」，把負面情緒視為洪水猛獸，即使他知道讀者群很可能是學生，仍直寫「明天不一定好天」。他說：「完全正能量好bullshit，我唔想呃人世界美好，當佢哋發現唔係，只會跌得更痛。我寧願講『你哋會遇到更多失敗，喊更加多，但即使唔成功，過程中所花嘅努力本身都有價值。』」真真正正堅過石堅的正能量是能夠接受負能量，而非壓下掩藏，視而不見。
你試過嗎：傷痛時故作堅強，假裝一切如常。「這種堅強其實需要被credit的。」面對失意的人，他認為要報以同理心，不要批判。「Don’t judge，你唔知對方發生過乜，先變成今日嘅佢。」
恐怖綁架經歷
Kevin思想比外表成熟，或許跟死神曾經在側有關。2014年他去美國當交換生，竟遇上綁匪。那時他初到埗，隨兩位女生朋友到三藩市遊玩，其中一位提及自己認識一名香港男士可駕車同行。當天一路上都沒事，原來陷阱在後頭。他吃晚飯時趁男人不在，隨口問朋友：「點解佢咁好，肯揸車載我哋去玩，你哋好熟？」原來女生三日前才於機場認識港男！此時Kevin已有戒心，港男最終露出凶相。「我哋話要回去了，佢車咗我哋去森林，趁佢唔為意，我哋三個衝落車，喺漆黑中喪跑咗一個鐘，佢有追我哋，走唔甩真係死鬼咗。」宿舍舍監後來告訴他們，這是綁架集團所為，不同國籍的綁匪會在機場找同鄉下手。「佢哋捉人可能想要護照甚至器官，都會販賣人口。」瘋狂一夜過去，他才驚覺死神可以近在咫尺，而且會窮追自己。「諗返嗰一晚好似拍戲，好dramatic，同死亡好近。呢件事令我覺得唔可以浪費時間，想做就要做咗先，因為可能再無下一次。」
相處貴乎雙方成長
生命的無常，讓他感受更深。「喺美國嗰段時間，有個當地認識嘅朋友突然間離開咗，後來才知他自殺。」死別當然難受，生離也幾乎令他不想再與人來往。他有位愛爾蘭室友，幾乎晚晚醉倒要他善後。「我成日要幫佢除鞋，執返佢條屍搬返上床，我開頭唔鍾意佢，覺得好煩。我哋好唔同，佢乜嘢都好求其，好亂，我好有條理，好有計劃。」
可是到這位麻煩友要離開，他卻天崩地裂式捨不得。「我同佢都喊到崩潰，因為可能真係一世都唔會再見，佢一走我真係好唔開心。」於是他鑽進牛角的最尖端。「如果每次道別都咁痛，不如唔好識新朋友。既然每段關係都會完，唔開始咪唔會痛囉？」獨自低落了數天，他收到對方的訊息，說自己前一晚沒飲醉，還懂得校鬧鐘準時起床。「佢同我講thank you。相處半年，佢識得自理，而我又無以前咁緊張，隨性咗好多。」他悟出了相處的真諦。「兩個人可以互相影響，其實幾幸福。一段關係唔在乎走到幾遠，而係你有無令對方成為更好嘅人。」他把這種領悟放諸於到學校做分享。「我想繼續用我嘅力量影響人，同時我覺得同學仔都有啟發到我。」
到校分享後，總會有些同學網上找他聊天。「近來多咗人在IG搵我傾，試過有人話想尋死，又有人覺得抑鬱，我真係乜都唔敢講，只可以俾對方知道我願意聆聽。我未必明白佢嘅經歷，但我會設法想像佢嘅感受。」他最近多看有關心理學的書籍，希望不會愈幫愈忙。「我怕再刺激到佢哋。」
完成兩本著作，他敲定了新作主題。「想講關係嗰種無奈，好多時我哋都無得揀。你做到五十，都要對方肯做五十才有一百分。」人一生有很多追求，但講到底都希望有人理解，有人欣賞，有人愛惜。「呢個係core，人最終需要嘅始終係愛。」憶起多年前一部電影《浪蕩天涯》（Into the Wild）末段，男主角竭力寫下了這一句：”Happiness is Only Real When Shared”。
