相約設計師Kylie Lee的過程，好有趣。
記者月前於「中央聖學子」設計專頁看到他展示Kylie三年前的畢業功課，並謂：「優秀學生作品，明明好過好多日常港式劣作，但因為種種市場同業界陋習，兼應用好設計文化嘅落後，令千千萬萬佳作埋沒於無底深淵。」
此前，他寫帖文怒轟香港兒童醫院外牆字款「太普通、太行、太predictable、太冇新意、欠獨特性」。Kylie的功課以兒童醫院為對像，從logo、院內標誌、字款、壁畫風格、用色到院內活動海報設計都細心周到，清新可喜。而且最重要：統一。概念具延伸性，不會「精神分裂」。聖學子欷歔地寫道：「對比之強烈⋯⋯唉～～～！」
於是記者聯絡Kylie，希望她談談設計理念。初出茅廬的她非常內斂，短訊中特別強調：「不希望其他設計師誤解我這經驗尚淺的designer評價人家設計，以為我覺得自己的設計最適合兒童醫院呢。」她又問我：「（相片）會影到人嗎？」，我只好回覆：「妳透明嗎？」然後她送我笑臉emoji後再三懇求，她的照片要「有咁細得咁細」。
訪問當天，她靦腆地儍笑謂：「其實份功課好幼嫩，而且唔夠fine。唔知點解大家咁鍾意，可能係同政府機構比，所以comment不至於太負面！」設計師最忌過分自信，尤其新晉，覺察自己有所不足，才能完善作品。
Kylie介紹她的設計概念，解說清晰具條理。她揀選兒童醫院為設計對像，源於她的家距離醫院只有五分鐘步程。「我間房個窗對正醫院，有時會覺得醫院氣氛有啲陰森。希望用設計令長期病患小朋友無咁不安。」她續笑說：「加上香港以前從來都無兒童醫院，設計嘅時候完全無壓力，無咁多框框。」
Logo現笑容 寓意樂觀面對
她設計的logo，概念源自香港兒童醫院的英文縮寫”hkch”。她把代表小孩（children）的c字輕微扭動，加上兩點作為眼睛，形成一張笑臉，美感與意義兼備，比起現在醫院採用的外牆字款順眼得多。「我用番圓少少嘅字，比較friendly。呢隻字筆劃圓渾，但骨架算方正，作為路標都可睇得清楚。中文用圓體，襯番英文。」
她當年做資料搜集時，得知兒童醫院將有四大專科，包括外科、腎臟科、心臟科及腫瘤科，她決定引用「顏色治療」概念，對應地採用四種有紓緩作用的顏色，分別為黃、橙、藍、綠，都偏粉色系，看來柔和溫暖。「外國有好多關於顏色嘅研究，例如美國監獄為咗令囚犯減低暴力傾向，會將監倉塗成粉紅色，又要佢哋著粉紅色囚衣，之後發現有效令佢哋少咗發嬲。」她認為即使顏色治療未必在醫學上受到認可，但如有輕微輔助作用都可考慮。「香港好多設計純粹只想色彩繽紛，無諗過顏色嘅作用。」
圖案緩和恐懼添趣味
結合點線、數字及英文字母，彈性地組合成各式icon及動物圖像，是她的設計重點。她當時幻想這樣能增加醫護人員與小孩的互動性。「例如可以問佢哋睇唔睇到當中有咩字母，係咩動物。」一堆標誌中，記者留意到有個用點線與字母拼成的天使圖案。「我相信醫院一定會有殮房，但唔希望令小朋友太驚，於是用天使來表示。」
醫院以病童為本，她那時構思水牌並不高高掛，遷就小朋友視點。「可能係好大隻字，放得好低，等小朋友可以知道自己去緊邊。」除了實用資訊，她又希望在牆上展示具鼓勵性的字句。「好多幼稚園都做緊，可能係一啲正面嘅quote咁。」
一個概念全面覆蓋
雖然外國都有醫院引入顏色治療概念，但Kylie絕非搬字過紙。「佢哋有用此概念，但graphics又未必好靚好夾，反而有參考外國幼稚園、日本診所，如何揀選傢俬、用不同主題分區等。」
現在回望設計，她覺得可以進步的空間不少。「顏色治療概念會唔會可以延伸到醫護人員制服，又或者藥袋呢？並非只係應用在大樓外觀，而係成件事配合。」她又指出如要令設計更貼合小朋友需要，該諮詢專責照顧的醫護人員意見。「始終佢哋先知點樣對小朋友最好，有無咩細心位係設計師忽略咗。」
推卻真實工作邀請
聖學子發帖文稱讚她的設計之前，原來有人更早留意到她這份功課。曾有室內設計公司人員在網上邀請她設計兒童醫院室內icon。「估計對方想我設計路標，但因為當時工作真係好忙，我推咗呢項工作。我有請對方聯絡我任職嘅設計公司，但之後就沒下文了。」
她認為如此大型的項目，如要另找設計師，理應委託一家公司，而非直接找一位設計師承接單次工作。她又笑言：「做功課就話啫，接咗嘅話做出來真係要面世，好大壓力呢！」猶幸現在兒童醫院內部設計屬高水準，否則我會把這名年輕人的相片拉頁放大至洩憤。
