阿力：「我紋身唔同你哋㗎， 你哋紋身會喺本簿度揀自己鍾意嘅圖案。我冇㗎，肥佬鍾意紋乜咪紋乜囉。」
阿力與阿波一樣，曾經有段時間經常進出監獄。但阿力進出監牢的次數更多，日子更漫長。甚至，有段時間，阿力覺得在牢內的生活，比牢外更適合自己。
七十年代初，只有十歲的阿力終日流連街頭，累了，就在公園露宿。「嗰時阿爸行船嘅，幾年先返一次。阿媽又管得嚴，咪同佢唔啱囉。而且自己又鍾意去玩，所以咪唔返屋企囉。」
「嗰時家住灣仔，玩開也是灣仔一帶。有次，有個大人請我哋成班𡃁仔出去飲飲食食，全部唔使錢。夜晚玩完啦，我咪返公園瞓囉。佢請多幾次，雖然冇正式講乜嘢，但我知道自己已經跟咗佢，算係佢嘅人。」
「閒時成班𡃁仔又會去分域街碼頭，等啲鬼佬水兵落船，帶佢哋去自己相熟嘅酒吧消遣，同埋紋身。嗰時唔係為錢㗎，只係想佢哋（酒吧、紋身店）多啲生意，有時酒吧又會請我哋食吓嘢咁囉。帶多幾次啲人上去紋身，漸漸就同紋身店嗰個肥佬（老闆）熟咗。有日，肥佬叫我第二朝開舖前一個鐘頭過去。嗰時我都唔知乜事㗎，第二日上到去，佢就叫我坐低，就係咁，就幫我喺心口紋咗兩隻小妖啦。過程只係幾十分鐘，印象冇乜㗎，只係記得佢同我講『睇你個樣都係會出嚟行㗎啦，紋咗似啲啊。』如是者，我身上的所有紋身，都係佢免費幫我紋。」
那年，第一次紋身，阿力十三歲。
其後，跟隨「大佬」辦事。累了，回到街頭露宿。十七歲開始被判入勞教中心，之後多次進出監牢，日子久了自覺牢房生活更為安穩，「起碼，有瓦遮頭，三餐定時定候。」
有段時間甚至剛出獄，就想辦法犯些事，盡快返回獄中，直至三十多歲那年，阿力被判了他人生中最長的刑期—六年，扣減假期後，服刑四年多的阿力不想再在監獄度過餘生，就決心改過自新。出獄後已是四十多歲，還是在街頭露宿，以散工維持生計，這樣漂泊的日子，一過就是二十多年。
直至某天遇上「同路舍」的義工，「嗰次班後生仔嚟探訪，一傾就同我傾成幾個鐘，都未試過同人傾偈傾咁耐，平時我唔講嘢㗎嘛。」之後阿力漸漸成為機構的義工，兩年多前更成為正式職員，以過來人身份幫助他口中的「街友」。協助「街友」重新接觸社會、重過新生活，就成為他的目標。
成為機構正式職員後，阿力租了一個單位，六十多歲終於有自己的家。之後又遇上「阿花」。「同事知我鍾意狗，就喺阿花BB時俾咗我養。」「佢啊（阿花），最鍾意夜晚跳上張牀喺個窗望街，有時又會上牀同我瞓。」
「依家可以話係我最開心、最安穩嘅時間。起碼我返屋企嗰時，有阿花好開心咁歡迎我。」
