選舉是香港式戰爭，鬥資金雄厚，鬥人多勢眾，心計不如會計，算到如何啱啱好比對手多票，就夠。兩個九十後繼去年眾籌推出七彩港鐵啤牌，再設計出有關香港選舉的 board game，偏偏無乜點抽政治水份，只望大家逆轉角色，換上候選人大腦，反思選舉工程。
即使我哋心底幾咁想 DQ 長期成功爭取閉目養神嘅立法會議員，都只係得個諗字。票都無得投呀大佬，功能組別於我等蟻民幾乎係零功能組別呀，DQ？有資格咩？扯遠咗，返返嚟，選舉桌遊同政治無關？正所謂買棵蔥都係政治喎。設計師之一黃梓峰（Princeton）說：「遊戲其實無刻意同香港現實情況扣連，好多 board game 都同戰爭有關，但放喺香港唔合適，就諗香港有啲乜係有競爭性，先諗到選舉。我哋反而希望抽離少少睇香港選舉制度，放眼世界唔同模式嘅選舉。公平選舉點定義？最多票就係最多人支持？當我哋逆轉為候選人，就能從對立位反思唔好咁易被操縱。」港式選舉，根本要預設將來入到立法會投票都影響唔到大局，全面直選到底幾時兌現？又拉遠咗，遊戲係睇邊個玩家最快搶到五大選區20張票為贏，分地方直選及功能組別。「功能組別簡化到只得七個，否則就太複雜。」唉，寧願現實無㖭啦！Princeton 續說：「到底係咪個個都知功能組別係乜？有乜組別可能好多人唔知。」
要票就要有錢
Board game 最引人注目係顯示 150 幾個區域的七彩地圖。另一設計師莫景誠（Kenny）說：「地圖盡量如實反映立法會選舉嘅選區界線。我哋好鍾意地圖，一直好想設計有香港地圖嘅 board game。」真實選票難得，遊戲選票一樣難求，要先抽區域牌，再用棋子在地圖上逐格前行到該區，要跨區嗎？還要付錢搭車搭船，所以話有票嘅前提係要有錢！
炫目地圖固然搶眼，區域牌一樣有細節位要人動用金睛火眼。每張牌左下角印有該區地標圖案。「希望大家了解多啲每個區，例如馬鞍山有旋轉木馬，真係有得玩，可能好多人都唔知。」屯門有人騎牛（笑），馬鞍山真係有馬騎？記者真係覺得學到好多嘢。當香港傳統景點險被鄰近經濟強國子民踩至陸沉，佢哋寧願介紹更多香港人有共鳴的地方。
上回二人推出港鐵站啤牌，在眾籌平台 KICKSTARTER 超額認購多倍，原來好多家長當係知識卡讓仔女學認車站。似乎今次地標建築圖案卡一樣有可能令呢個選舉game變成家長眼中的通識遊戲。
