在老友家吃飽飯沒事做，自然輪到「交換秘密」的戲肉上場。
無端端講到她原來有個「走佬袋」！
即係咩唧？
將重要的「現金股票屋契文件證書珠寶首飾紀念品」預先放到同一個手提包包入面，重點是「有乜冬瓜豆腐唔使執即刻走得！」
我一聽，腦海中的問題馬上如Facebook Live畫面上的Emoji般湧出！
一袋宗師
首先想知她從何時開始有「走佬袋」這個概念？到底是她危機感過分茂盛還是她對香港這個城市的信心值已跌到一個「隨時撇」的臨界點？如果這兒是東京，一個政府都正式宣布了未來30年內必有一超級地震不過未知確切是幾時的城市，不但走佬袋，買定防空洞我都理解！如果她是《Bourne Identity》系列間諜片的死硬粉絲，枕頭底有26本護照32種貨幣和一個用來裝起晒呢啲嘢嘅「走佬袋」我亦明白。但這位朋友的解釋只是因為怕火燭或者冧樓「驚走唔切」而設，聽起來便有點「為興趣」的反高潮了。
是的，下個問題我本來想問：咁「走佬袋」未走佬的時候到底儲藏在家中哪兒？如果放夾萬之內，驚鐘一響就算嚇不走你那6個字的password，要㩒完一輪按鈕才拿得到的話就撤退得不瀟灑敏捷了吧？（其實我真心想講嗰句係太複雜會唔會未攞到已經燒死咗？）但如果為求一拎即走而不放夾萬……你真係夠膽放晒頭先數咁多嘢入去？
好吧，結果我真的問出口的是另一條（我估大家都好想問的）問題：咁你會揀乜嘢袋嚟做呢個「走佬袋」呢？
是的，這位朋友和你和我都一樣，都是個嗜袋如命乜包都有的「人肉米蘭站」，咁到底走佬時你會帶個盡量唔起眼，樣衰衰一定唔會吸引匪徒注意的爛袋cheap袋，希望上演一幕完美嘅「禾稈冚珍珠」吖？還是人一世物一世梗係攞自己最like最名貴果隻鱷魚皮Birkin，至少流亡海外盤川散盡時都可以連隻袋都「舉」埋佢話唔定仲可以救一時之急呢？
我們迫那個朋友把她那隻「走佬袋」拎出嚟開估：結果相當反高潮，因為一方面良知告訴她兵荒馬亂不可太招積張揚，但作為時裝精又有隻心魔阻止她真的太肉酸求其……結果她的走佬袋是個唔靚唔起眼又唔值錢但總算「名牌」的三線名牌袋！
其實in the first place我都唔係幾明「天下太平」時她點解會買隻咁嘅袋！
咁又有無「走佬衫」？
隨着年齡漸長，我可以不瞞大家我是有「走佬裝」這個「概念」的，不只為天災作預備，也考慮到自己可能有一天突然在浴室跌斷骨或者半夜心絞痛之類大吉利是情況，如果長期襯定執定一套入院／走難的專用服放喺就手當眼位置，就算唔係世界未日降臨，都至少都有套似樣啲嘅衫以防自己上落白車時撞到熟人……
至於為什麼只是「概念」呢？因為我信這個世界有樣東西叫「功底」，即是一旦某㮔「技能get」便返不到轉頭，比如一個真正懂唱歌的人扮五音不全，或者一個堅識做戲的人扮戲屎，通常都不會很像，因為那個「竅」開了，其實無咁易閂得番。
時裝修養大概也如此，一旦你領悟了襯衫的基本原則，那麼即使你要「走鬼」，面前有13條褲55件上衣9件褸21對鞋，而你只得1秒鐘執一套衫出嚟「散水」，你只憑直覺每樣是但潛一件出來也是match的，想唔match反而難（除非嗰堆衫入面真係十六不搭），所以呢，只要有「功底」在，仲使乜執定「走佬裝」？
反而我們這種跑fashion week的，每次在巴黎米蘭倫敦紐約浪蕩一頭半個月，日日出力打扮到隻彩雀一樣，審美疲勞地收工回港後，一定有一兩星期完全唔想扮靚，最好每日至舒服至「烏where」咁出街。我叫它做「時裝節後遺症之萬念俱灰週」。
但就是因為那個叫做「功底」的東西，你要不經大腦地襯得好錯出街也是不容易的，就算發晦氣只穿track bottom和白tee的組合，你的功底瞇埋眼都會幫你揀中啱色啱cutting那兩件，唔通因為兵荒馬亂你屋企會無端端有對你根本未買過嘅Croc？
所以有時想醜樣見人報復社會，原來還真的要動用真氣使出真功夫呢！
