創業難，守業更難，守住香港製造工業難上加難。從上世紀百花齊放的製造業黃金時代，歷經多次經濟危機和疫情考驗，能夠捱到今時今日，他們本來就已經是汰弱留強下的頑強鬥士。原以為可以在政府工廠大廈可以求得安穩，專心經營廠務，怎料政府一聲令下，四座工廠大廈同時面臨清拆重建，這樣對香港僅存的本地廠家有多麼沉重的打擊？
一枚膠圈 防水手錶的奧秘
「呢啲膠圈就放落錶殼度，再壓塊玻璃落去，逼到實，咪唔會入水囉。」
在本地鐘錶業式微的今日，岑生的工廠仍然維持每日數以萬計的產量。岑生在葵安工廠大廈開廠生產防水手錶用的膠圈已有二、三十年，「一直以來都有咁嘅需要，手錶冇個膠圈點樣防水呢？」他解說不論手錶款式怎麼變都要用同一種膠圈，分別只在於，「以前膠圈係『啤』出嚟，依家係『車』出嚟，車就準啲、靚啲。」
在九十年代的全盛時期，工廠日產高達十萬個膠圈，是目前產量的三倍。說起舊時岑生便眉飛色舞，「香港鐘錶業好勁，產量世界第一，雄霸咗好多年。」光是葵安一座工廈都有好幾間錶廠，分別生產錶殼、錶底、錶帶等不同零件，行家都會你介紹我、我介紹你。那也是葵安最熱鬧的時期，「大家都好生意，好多貨物擺晒喺條走廊度，啲人呱呱嘈，推車仔都過唔到。」岑生邊笑邊憶述。
千禧年後，同行大多北上發展，本地的膠圈廠也從七間、八間，到目前只餘岑生和另一間工廠。但岑生表明，自己從不考慮北上開廠，「上面嘅環境我唔係咁喜歡，想留在香港，屋企人都在香港。」岑生廠在香港，內地的客戶也照樣找他合作，全因信賴他的出品，「或者我哋做慣做熟，有少少知名度啦，啲客都會搵返我哋，一個介紹一個，有口碑。」他自豪說，好些客戶一合作便是十幾廿年，交情深厚，「有啲客好忠心，搵咗我哋就唔會再轉。」
十多台機器每日轉個不停，年逾七十的岑生也日日堅持回廠開工，風雨不改。「我做到嘢㗎，下午兩點鐘先返嚟，但我做到今晚兩點後先走。」午飯時間已過，岑生卻笑言自己才剛吃完早餐，三點半再吃「晏晝飯」。同事紛紛補充說，「佢初一放假，初二就回廠開工！」，「以前多嘢做，佢一個人睇十台機，留到天光先走！」多年來一直咬緊牙關、默默堅持，岑生可不想輕易放棄間廠，他本來已經找到了接班人高生，打算逐步交棒，可惜如意算盤被政府重建計劃打爛。他和高生近月都為搬廠一事忙個不停。
雖然政府提出了早鳥優惠給明年二月搬走的租戶，但在他們眼中根本是不可能的任務。他們去過其他工廈看環境，用尺子一量，發現機器都太大、太闊，入不了廠房門口，也過不到走廊。岑生還直言，像他這種工廠，許多私人業主都不歡迎，「嘈喎，有煙喎，唔租俾你囉。」「好慶幸可以留到今時今日，如果不是有熟客支持，一早已經結業。如果真的到呢個地步，唔捨得啲機器，擺咗好多心機同心血落去⋯⋯」岑生不由得感嘆。
