來到中環嘉咸街的露天街巿，廣東話老師甘茜蓮（阿茜）徐徐穿梭在熙來攘往的人流中，她自如地同檔口打招呼：「你今日生意好唔好？」
阿茜一眼看中那條飽滿的蓮藕，拎起問菜檔老闆：「呢個幾錢？」「十七蚊。」菜檔阿叔說。她一邊從錢包裏掏錢，一邊風趣地說：「兩元得唔得？八達通得唔得？」「得，乜都得，用Visa都得……你真係叻喔。」阿叔大笑。「冇你咁x叻，我識少少扮代表……」
離開菜檔，阿茜抬頭望旁邊圍起的建築地盤，嘆氣道：「真正嘅街市已經冇咗好多，好快冇晒，呢度愈嚟愈似普通露天超市！」這香港巿區最古老的巿集在「重建」與「發展」的名義下早已被改頭換面。
「香港同以前比真係好x大分別！以前香港好特別，好有趣。舊時我坐喺尖沙咀、油麻地街邊周圍望，即刻知道呢度係香港。香港政府以為遊客嚟香港淨係想買嘢，其實遊客鍾意睇舊香港。」
來自挪威的作家甘茜蓮（阿茜）本名Cecilie Gamst Berg，1988年，天生愛闖蕩天涯的她搭火車到北京。當時，她感覺自己像個明星，人人都簇擁她。「我鍾意黑頭髮、黑眼睛、黃皮膚。」原本想留在北京，但幾個月後公安說她簽證快過期，到時不能拿新簽證，建議她去香港，這樣隨時可以回大陸。
「唔該講廣東話。」
她形容，與香港的緣份像是冥冥中安排好的婚事。她對香港的第一印象並不好。人太忙，車太多，銀行太密集。那時她感覺香港太華麗，自己像個鄉下人。 一兩個月後，她漸漸愛上香港。「我鍾意廣東話，鍾意去飲茶，鍾意睇周星馳，香港人好友善……香港好似係我一個結咗婚好耐嘅老公，開始冇咁鍾意佢，但後來慢慢愛上佢。」
1989年，初來乍到的阿茜為省錢入住重慶大厦。八人共居一屋，每晚牀位四十元，火警鐘晚晚都響，住了三個月，終於「頂唔順」，搬了去大嶼山，「好似天堂咁靚！」從此落地生根。
如今她對大嶼山的發展卻又多了一份憂心。「梅窩毋須變天水圍，唔係個個都想住喺65樓，無街坊，無人理。希望香港可以保護大嶼山呢個香港嘅綠肺。」
阿茜的廣東話靠自學。在餐廳同夥計傾偈，士多、街市周圍同人傾偈，活學活用，「香港有七百萬個老師，可以免費學。」學了兩、三年就開始教學生，扮鬼扮馬、粉墨登場拍片推廣。她曾在香港電台主持網絡節目Naked Cantonese教外國人說廣東話，走上街頭找活生生的素材。
數年前，阿茜自製標語「香港人講廣東話！聽唔明就返鄉下！」出現在捍衞粵語教學的遊行中。行人對她嘖嘖稱奇：「你明唔明咩意思㗎？」她聽了火冒三丈。「係我寫嘅，你話我明唔明？我係香港人，識講廣東話識寫中文，但香港人成日同我講英文。激死！」
香港人好睇唔起自己的文化
阿茜視香港為家，她愛香港、愛廣東話、愛飲茶、愛凍檸茶少甜、愛大嶼山水牛……廿七年了，大半世在香港生活，她最無奈就是香港人不會同她講廣東話，她感覺似乎香港並未真正接受她。
與其說香港未能接受她，不如說是香港人並未看重自己的文化和語言。「香港人好睇唔起自己的文化，見有外國人說廣東話，會即刻講返英文，唔俾機會外國人講廣東話！」
她住大嶼山，每天搭船去中環。就在前天，又有熱心港人用英文告訴她船是去中環，解釋如何用八達通，「令我好攰。」 她同士多老闆聊天二十分鐘，對方又轉用英文。她說，很多學生頂不順這種狀態，放棄講廣東話。「我淨係希望如果我去舖頭買嘢，問老闆問呢條褲有冇紅色啊？她會答我『有啊』。」可惜好多時大家聽到她地道的廣東話，都顧着拍掌讚歎：「你識講廣東話？！」接着就同她說英文。「哇，你好叻！」這樣的話，她一聽到就皺眉，那種當她是異族的眼光令她很不舒服。「當我係五歲小朋友識揸車咁。」
她稱自己為「龍的傳鬼」。有時會思念挪威人，但她不喜歡挪威。「我唔鍾意凍冰冰，黑麻麻，我份人好熱血嘛。」熱血的她，最希望香港依然擁有一份自由，相信這也是香港人共同的願望。
