在法國當藝人的Sony Chan言辭達譚仔特辣級數，受不了的人會略過，愛的會大呼過癮。
Sony Chan在港土生土長，中文名陳茗倫，1987年隨家人移民法國，從沒忘記出身，廣東話流利過很多偽ABC及新香港人。Sony「紅返家鄉」，是由於她「擔遮扑振英」。年前她把握機會，在當地電視節目與一眾法籍明星，用廣東話高唱「還願你跟我盡情擔遮扑振英」，為香港人吐悶氣，贏得高分貝獎聲，短片在港一夜風行。
拒絕性別定型
及後她製作多條以廣東話教授法文的短片，偶爾論及香港時事。有得笑又有嘢落袋，收了不少粉絲。大家卻開始把焦點放在這位幽默同鄉的性別上。「我無定位，你叫我陳生，我又打招呼；你叫我陳小姐，我又打招呼。以前有人覺得無結婚生仔就唔係真正女人，如果你喺自己身上貼呢啲label，就會有很多掙扎。但見識越多，你畀自己自由越多，會知道做男或者做女，唔止一種方式。」性別多元提倡良久，大家對跨性別人士仍充滿好奇，甚至歧視，反映教育及討論的不足。
你有你猜度，已過不惑之年的她選擇特立獨行，毒舌不饒人。自信讓她如同內置射燈，突出搶眼有態度。這段時間，她回港開騷《熟女心經》，演出集合棟篤笑、教法文、戲劇、另類時裝catwalk等，加場後依然光速爆滿，印證香港擁護者不少。
女人四十仍有無限可能
以往有句貶低女性的封建話「女人四十爛茶渣」，告誡女人年華老去沒市場。她擺出神氣貌，說：「我覺得自己四十二歲都keep得幾好，唔爛茶渣喎。我真係『熟』晒，但講到好「熟」，仍然大癲大肺，心境仲係好青春。」訪問當天，她因還未適應時差沒有睡過，略帶倦容，但膚質的細嫩讓記者羡慕不已。「只要你想靚，你個表情就會靚，用意志力就得，千祈唔好去整容，個個啲雙眼皮一模一樣。」對動刀修容，她嗤之以鼻，但對於美，她誓死用自己的方式捍衛，對維持24吋腰肢的追求，達「控制狂」級數。「我好懶，唔做運動，過咗三十七歲，啲脂肪真係burn唔到，我將食量減剩三分一。」她謂這不是犧牲，因為她喜歡吃的她照樣吃，只減了量。
讓她看來不似四字頭，除了纖腰美肌，更重要是「周身痕唔願停」的行動力。「呢個世代讀完書，眨下眼就三十歲，然後喺社會打滾下，可能到三十八、九歲，先真係做到鍾意嘅事。我仲有好多嘢未做，除咗電台、電視工作，仲想畫漫畫故事。細個放暑假，我可以兩個月每日都畫。」大學時她修讀建築，畢業後曾在則樓工作，如她所料這份工作並不適合自己。「我細細個就發明星夢，我曾經喺香港考過演員訓練班，但無回音。」她2009年出過唱片，名為《Be a star》。對於當明星，她從來不惑。
香港人把法國與浪漫劃上等號，以為法蘭西人對性小眾大多寬容開放。「梗係唔係啦，大家對法國太多幻想，法國都有好保守嘅一面，但我唔太理人點睇我，最後我都係跟自己嗰套。」可以想像她在彼邦必然受過不禮貌對待，當上電台節目主持及演員，路途也九曲十三彎。但她認為做人，只管對自己交代，對難堪事，她從容應對。
高官搞笑本領更高
Sony混身幽默感，收放自如；香港高官個個急於噴射式展露諧星細胞、喜劇之王DNA。關心香港政事的時裝精Sony留意到最近有位官員「清裝」打扮異常出位。「佢個髮型又似係襯咗，好犀利，真係唔知佢玩緊第幾重幽默感。勁到我覺得佢係反映緊社會某啲嘢，不過反映咩就唔知啦！」利小姐當日言論有理有節，卻被浮誇古裝蓋過。「法國政界女士通常打扮低調優雅。睇落套衫好普通，留意下會發現質地好好，再睇清楚原來剪裁都好靚。」Sony認為法國人不會把不合場合的服飾放上身。「點都有個譜，有啲嘢係抵佢哋串，法國人嘅品味，係越嗒越有味道。」
我永遠係香港人
法國有她崇尚的生活品味，不代表她一面倒覺得法蘭西月亮較圓。雖然她法語流利得可以在當地主持電台節目，甚至講棟篤笑，但她心知廣東話才是母語。她對「香港人」身份從來自豪。「我喺香港出世，我就係香港人，你攞咩護照都唔代表啲乜，唔通你覺得我呢個樣係法國人咩？」香港的「熟女」騷上，她把印上Hong Kong字樣的Tee穿在身，強調自己的身份。
她上一次回港已是十一年前，不是不愛這片土地，是由於「移民後遺症」。「我一要執行李、搭飛機就唔開心，因為嗰時細個移民要同親人分開，離鄉別井感覺好慘。所以自從我公公過身，香港無其他親人要探，我就一直喺巴黎發展無返來。」
香港近年「劇變」，一年前後已是兩個世界，更何況是十一年。「身邊人同我講咗好多，我有好差嘅心理準備，我以為會被拖篋碌過，同埋完全無人講廣東話，但我發覺唔係，我覺得這個地方仲係好可愛，好有動力。」
(部份圖片由受訪者提供)
