會唔會太困難？會唔會太熱血？會唔會太有愛？難到頂點，熱到爆煲，愛到獅子山之巔。
去年底，「包山王」黎志偉連人帶輪椅攀上獅子山「獅頭」，嗰啲 mission impossible 級挑戰，嗰班心口掛個義字的朋友，嗰啲最柔情的鐵漢感受，都詳載於九十二分鐘的紀錄片《結CRUX》之中。記者看電影哭點一向高過 ICC，但看到片中堅有愛真熱血的訪談，真係流了兩行眼淚。
黎志偉，四屆「亞洲攀石錦標賽」冠軍，卻於 2011 年遇上交通意外，致下半身癱瘓。片中穿插他出事前玩 X Game 徒手攀石的驚人片段，驚人在於他四肢協調能力之高，矯健如蜘蛛俠，重點係零 CG！天賦好身手，上蒼一下收回，對本來如像懂輕功的他來說，極殘忍。
長期坐輪椅，身體負擔難以想像。黎志偉說：「坐八個鐘，條腰其實好攰。傷殘引發好多病症，有時雙腳會腫。」他希望趁身體仍能負荷前，衝破輪椅局限。他拿出運動員的心理質素，操fit體能，借助臂力以繩索把自己及輪椅拉上獅子山頂。2016 年 12 月 9 日，這個日子極具意義，是交通意外五周年，擇日攻頂，是為了解除心結。「同十個人講，十個人都覺得我無可能完成。我想證實自己做得到。」計劃構思於 2014 年，至完成前盡是攀爬訓練、技術調整、線道佈局工作。
他在獅子山懸崖底設定起點，如果在這裏攻上山頂終點似遠征火星，要從地面去到起點，其實難如登陸太陽。黎志偉不能獨自走山路前去，他三十多位好友及義工，以人肉方式接力把他揹到起點，撐他完成重生的夢。由跌跌撞撞的事前訓練到最終征服崎嶇山路，都是義氣與力氣的表現。凌晨趕路，驚險場面不少，最終團隊把他連同輪椅送到獅子山頂，再從崖頂游繩下降約 100 米到達起點。策劃這部紀錄片的何善中希望聚焦這批幕後功臣。「呢部片無主角，過程比結果來得緊要。即使親生兄弟都未必肯揹你上獅子山，佢哋到底為咗乜呢？」出心出力的他們同樣值得掌聲。
紀錄片攝製團隊全為義工，無 budget 自然要一個打十個，兼任多個崗位，導演及監製都要掌鏡。何善中說：「為咗有多角度影像，我哋事前上過好多次山，定好機位。但我哋始終得五個人，無辦法抬晒所有器材上山，多得跑會義工後生仔幫手運送。」他提到當晚溫度極低，部分攝影義工要提早登山，食住西北風在山頭等候大隊到臨；而當太陽出來，又變得非常炎熱，秒秒影像都得來不易。
交通意外前，黎志偉三扒兩撥就能攀完那百米石牆。但今次最後 10 米，他卻足足用了一個多小時。「輪椅不斷磨到石牆，我可以叫人拉我上去，但係佢哋已經幫我去到起點，終點我想靠自己。」片名的 “CRUX” 是攀岩術語，指攀爬路線最難關頭。世上無難事，只怕有 heart 人，而且有 heart 的今次不止一個，而是一伙。
紀錄片首映將於10月6日於九展星影匯舉行，捐款滿$600 可換領首映禮門票。收益撥捐九龍樂善堂，作為與「香港中文大學」合作的學童精神健康計劃經費。
<!–查詢：www.loksintong.org–>
