情緒病，抽乾耗盡淘空殲滅一個人的能量。弱弱地透支力氣接受治療，效果不似預期，一次又一次掉進谷底，然後發現塵世間最恐怖的谷底，叫深不見底。放棄好像比堅持容易……
插畫師、圖文書作者Cliffy鵝王說：「我想做啲嘢令佢哋知道，仲有方法可以試，畀多個機會自己。」他去年出版《有關抑鬱這回事》一書，老早決定把版稅捐予情緒病支援機構，最後受惠的是非牟利的「香港表達藝術治療服務中心」，資助有需要者參加「治療小組」，藉不同藝術媒介梳理情緒。「表達藝術治療」令人充滿黑人問號；捐款一份，竟變雙份，再變三份！問號倍增。
捐錢前諗清諗楚
「大機構資金充足，捐錢畀佢哋，我只係攞光環。」求其捐錢，影相發帖，掌聲照收，乾手淨腳，但Cliffy寧願慎選機構。「社會有個資源錯配問題，好多人有事都搵大機構求助，但打電話過去，未必即時有人聽，有網友同我講打去只係聽到電話錄音講『明天會更好』。小型機構服務優質又平，但無奈無資源宣傳，無人識。」思前想後，啱啱遇着剛剛，他認識了理念相近，花盡積蓄開設「香港表達藝術治療服務中心」的四位年輕治療師，決定送上捐款。「點知佢哋諗咗兩秒就話『好，你捐幾多，我哋治療中心都捐幾多』。」加上出版社亮光文化早已答允作等額捐款，治療小組最終由三方捐款成就，首批參加者也開始了療程。
支援情緒病的公立服務總是等到天荒地老，患者向私人執業的專業人士求診，費用高昂，揹着重如泰山的經濟負擔，根本無力找其他治療方法。「平日見心理醫生、輔導45分鐘可能已經成千蚊。表達藝術治療聽落係貴族玩意，但我哋六節收600蚊，如果全數出席，仲可以退番300蚊，推動佢哋每次都來。」餘下收入會撥入下一輪資助計劃。小組早前招生，申請超額N倍，即使開展第二輪，依然供不應求。他們正積極找其他資助，讓治療小組深入社區，服務更多人。
抑鬱偏偏選中我
Cliffy數年前曾被抑鬱情緒纏上，令他每晚心跳冒汗吃不下睡不着，自殺念頭閃過又閃。「好似鬼上身，唔知點解會咁。」他說這隻「鬼」沒來由的就選中了他，讓他切身感受大眾對「抑鬱」的誤解、受困擾者難以言喻的痛苦，才衍生《有關抑鬱這回事》這本圖文書。書中經常出現「面譜大師」，他戴上各式面具在人前遮掩愁容，卻從沒了解自己內心真正所想，跟自己好好溝通。「經歷咗咁多令我明白唔使夾硬踢走黑暗嘅自己，一味正能量，反而係學習同抑鬱情緒共存。」
表達藝術治療是指以繪畫、黏土、寫作、舞蹈、肢體動作、戲劇、音樂等藝術媒介表達複雜情緒，由導師帶領，透過創作達到治療效果。一本通書不能睇到你變長者的一天，一種治療方法當然也無法醫好悉數患者。Cliffy無意神化治療功效，只望提供多一個選擇。「讀者來信話好想死，好想放棄。佢哋唔明點解醫咗三年、五年，甚至十年，仲未好。但佢願意話畀人聽，潛台詞係『我想被幫助』，只係試過好多方法都無用，然後更加討厭自己。我好想話畀佢哋知未試晒㗎，呢樣嘢有機會幫到你。」
逃避與壓抑，只會壯大問題，起勢注入高純度正能量，忌諱談死，不提黑暗，就真的一天都光晒？Cliffy憶起當年靠讀禁書《完全自殺手冊》了解死亡，反而消除了輕生念頭。他也慶幸自己一直不自覺地用藝術抒發負面情緒。「原來我畫畫、寫作，甚至去學小結他，都算係做緊呢樣嘢。我成世人都沒掂過樂器，但呢件事幫我度過咗嗰段日子。」
表達藝術治療無門檻
如果我甚麼都有，就是沒一粒藝術細胞，畫火柴人都歪斜，五音不全，手腳又不協調，是否注定與這種治療方法無緣？表達藝術治療師Canna說：「係咪藝術家，學過先做得呢？唔係。其實每個人天生都識得用藝術媒介表達自己﹐表達藝術治療對技巧要求唔高。」拋開美醜，懂與不懂的規範，享受創作過程就已足夠。「我哋傾向喺認知層面表達負面情緒，即係講出來，但呢種方式其實不足以表達抽象、複雜嘅情緒。」單對單的治療具針對性，小組形式也有好處。「一班有相似經歷的人可以互相扶持，嗰個網絡比起治療師支援，更長遠，更有意義。」
記者請他們示範治療過程，導師先要組員跳「影子舞」，二人一組，一方隨着音樂即興創作舞步，另一方要幻想自己是對方的鏡像手舞足蹈。Canna解釋：「情緒受困擾者一般欠缺社交同工作動力，透過呢類創作，畀誘因佢哋伸展下，佢哋會有多啲開心嘅感覺。」
「放鬆啲啦」、「唔好咁繃緊」，知易行難。其實身心互有關聯，緩解心理症狀可以從肢體動作入手。「叫你放鬆心情，好抽象，轉一個切入點，我哋話放鬆身體，就易做得多。例如行得太快太急，好易令人情緒繃緊，透過小組行路練習，令佢哋對唔同人嘅步速有多啲覺察，都有助佢哋調慢生活節奏。」
舞蹈與肢體練習後，治療師請大家繪畫或以黏土表達練習過後的感受。「點樣演繹作品係佢哋嘅自由，我哋唔會批判任何嘢，佢哋可以當一個故事咁講出來，從而抒發情緒。藝術本身就有療癒作用，治療師從中帶領佢哋觀察，令佢哋對自己有更深嘅了解。」療程過後參加者如果保持創作習慣，也可當作心理保健。
四位「香港表達藝術治療服務中心」創辦人Canna、Zoe、Keith及Janet一年多前完成香港大學的表達藝術治療碩士課程後，於澳洲及紐西蘭註冊為治療師。四人義務兼顧中心職務，有辛無薪，一周做足七日，「假期」對他們來說，好陌生。他們更把另外打工賺取的大部分收入都投放中心。四人名符其實「在職貧窮」。他們笑說：「要用語言藝術呃住屋企人。」咁辛苦為乜？「窮就唔可以做藝術？我哋唔願意相信個世界係咁，人唔應該分等級。」
過去一年，他們四出到學校做服務，也走入社區辦活動，介紹這種看來「另類」的治療方式。正如Cliffy所講，他們可以私人執業圖利，但他們選擇收取低廉費用，「蝕住做」，讓更多人受惠。
一筆版稅，金額或許微不足道，但蝴蝶效應帶來的影響，可以無限大。
