「初一十五」豈止食齋咁簡單　年輕設計師公開習俗實用指南　

初一十五由四名成員組成，包括阿Mo、Catherine、阿奇及Dicky（左起）。

歌仔都有得你唱：「懷緬過去常陶醉」，四位合作經營設計製作室的工作夥伴，公餘時最愛傾談本土懷舊文化，但發現年輕一輩說起傳統風俗儀式卻總是一知半解。為了承傳香港風土習俗，他們在去年底推出名為「初一十五」的交流平台，親身落區訪問紙紮師傅，又到處做街訪，自製祭祀實用指南，分享各式做節習俗、神佛典故、殯儀及節氣曆法等資訊，把握時間留住傳統智慧。

儀式以外　拉近親朋關係

後生仔可能會問，初一、十五聽得多，究竟這兩天有什麼特別？「基於佛教或者拜觀音嘅傳統，初一十五通常就係大家食齋嘅日子。而信奉道教或者茅山嘅人，呢兩日一般會番師傅嗰壇度拜神。」即使民眾間有不同的信仰，信奉的宗教理念相異，但舊時每逢這兩天街頭和廟宇都份外熱鬧忙碌。

成員們有些在屋邨長大，鄰里關係親密，有些則在舖頭成長，視員工為家人，自小習慣每逢節慶，都聚首一堂做節和祭祀祈福，長大後才頓覺今現社會人際關係疏離，後生一輩似乎看輕了此等儀式的意義，「當初揀呢兩個日子去改名，係因為我哋覺得喺呢啲日子，就算唔做儀式都好，大家都應該同屋企人聚吓。做牙、拜神呢啲events嘅其中一個功能，令家人同左鄰右里走埋一齊，就算搬咗出去，都會定時定候番嚟食餐飯。」在他們眼中，傳統不只是尋根重要的一環，亦是連繫感情的推動力。

以前宗教習俗某程度與家庭關係密不可分。（截圖自「初一十五」官方網站）

街坊訪談　重拾社區人情味

阿奇的祖父上年過世，與家人整理遺物時發現祖父生前收藏了不少古書。雖然文本未必大派用場，但這次機會卻讓他們聊起家人間一件關於冥婚的經歷，啟發團隊與讀者分享冥婚資訊。

成員Catherine畢業於中文及歷史系，她主力負責文獻探究及史料核實，堅持把最貼近事實的資料呈現人前，除了翻查文本，組員亦不時向摯親好友打探，甚至落區搜羅故事。她說：「做咗呢個project之後，我哋多咗同讀書時嘅教授前輩、屋企嘅長輩、以前唔多講嘢嘅鄰居、甚至唔同區嘅街坊傾偈，過程中發掘咗好多趣聞。例如曾經訪問過一個好老嘅紙紥師傅，佢話自己專紥名車，所以成日都要去睇車展，要與時並進咁話，真係估佢唔到！」

另一邊廂，Dicky亦發現自己因此與家人多了共同話題，「以前唔知佢哋做咩要拜神，雙方無咩點溝通，但呢個project令我自己倒番轉頭了解佢哋為咩要咁做，甚至肯主動同佢哋一齊去做。」

畢業於中文系與歷史系的Catherine（左）重視資料的準確性，堅持把故事分享到平台之前，要進行資料印證和核實。身旁的阿奇則負責較多「落區」訪談的部分。

手作實踐　不流於文字記錄

Catherine認為，單靠文字記載不足以把傳統一脈相承，因此他們希望「初一十五」能將漸被遺忘的民間習俗，重新融入現代生活。她解釋：「平時大家成日吹水話有幾鍾意啲懷舊嘢，直到上年中秋，阿奇整咗呢嗰菱角風車，於是我哋就諗到不如教人整番呢啲嘢，慢慢發展之下就變成依家呢個project。我哋覺得齋講係無意思，如果唔去practice，無論你拍幾多片、影幾多相、寫幾多字去分享都係無用。大家係要透過真正落手體驗先會有感受。」

製作菱角風車的材料相當簡單，只需用上竹枝、菱角和幼繩。拉動繩子時，菱角便會像風車般轉動。

阿奇製作的菱角風車，原來背後也有段故，「十幾年前阿媽無啦啦用菱角整咗呢個風車，又試過用罐頭整燈籠，話佢細個喺屋邨就係玩呢啲嘢。嗰時仲細，都無特別放上心。後來佢喺我Form3、4嗰時過咗身，我突然諗番起呢個風車，於是問人有無見過、識唔識整。點知問咗好多人，都無人記得。」

尋覓多年也遍尋不果，就在灰心之際，他遇上一絲曙光。「上年喺Facebook某個page見到有人分享製作方法，當然好開心喇，咪即刻去街市買料整，仲整咗一堆送俾人。」古老當時興，這些曾是平平無奇的屋邨玩意，對80後的他們來說卻是新奇有趣。

事後，就連阿Mo亦表示之前不知菱角為中秋應節食品之一，眾人即起哄笑指小妮子生於90後。「當初仲以為呢嚿嘢喺五金舖買，因為硬繃繃嘛！」這個斷層讓他們明白，無論是手藝還是習俗，假如不再做下去，就只會自斷文化根脈。

舊時資源匱乏，孩童的生活樸實，沒有太多消遣玩意，只能自己玩具自己造，用家裡找到的物料動手D.I.Y。這款中秋傳統玩具——菱角風車，就是其中一種。沒想到昔日玩物，間接促成「初一十五」的誕生。

除了撰寫文章，他們還積極籌備活動，甚至計畫推出關於節慶習俗的相應服務和產品。就在上個月的農曆新年期間，他們小試牛刀，為無暇準備團年飯、又不想外出用餐的年輕一輩推出團年送餐服務，使客人不費吹灰之力也能重拾兒時在家共享天倫樂的回憶。

他們亦嘗試聯絡道教及佛教組織、紙紥殯儀家族、生死教育機構及學府歷史系團體，作文化交流。「當然其中一個因素係需要籌集經費先可以繼續run到成件事，另一方面，活動同服務可以俾機會大家重新接觸同認識呢啲習俗，都係好事。坊間有好多呢類型網站同平台分享類似嘅資訊，但如果唔套用落生活層面，其實同圖書館入面嘅書一樣，無人借就只會塵封喺書架上面，淪為一堆無用嘅資料。」

避免失傳　提供習俗實用指南

Catherine回想，自己也曾墮入家族習俗難以為繼的考驗，成為另一個促成「初一十五」成立的誘因。「其實我屋企幾房人關係好親密，大時大節一定聚埋一齊，做節拜山做得好密。但自從屋企老人家走咗之後，山大家照拜，但係點拜呢？嗰刻先發現唔知點做。」以前有祖母為大家準備妥當，如今卻無人知曉該如何張羅。「舊陣時咩都阿嫲準備晒，依家無喇，咁邊嗰去準備？唔係我哋唔肯去搞，而係點搞先得㗎？咁唯有記得一樣就執一樣。但諗諗吓又覺唔對路，啲嘢買番嚟又好似唔同樣喎。」Catherine與家人合力整理依稀零碎的記憶，卻發現貨不對辦，於是轉向朋友和師傅請教。

後來，她一位移居外地的友人竟碰上類似的疑難，向她高呼「SOS」求救。「我呢位朋友成家都住喺加拿大，佢太太啲屋企人都係移民咗嗰邊嘅香港人。上年佢哋番香港，太太阿爸就托佢哋返開嚟拜吓阿嫲。但係兩個都喺外國大，無咩點拜過山，屋企人出發前淨係交低咗嗰地址。佢哋去到個墓前面唔知要做啲咩，於是就問我。咁我就叫佢哋去下面香燭舖買嘢拜，點知佢哋以為買一支蠟燭同一支香就夠。我feel到佢兩個係理解中國人要慎終追遠，呢嗰精神佢哋係有嘅，但成套嘢實際要做咩，去到佢哋到就已經失傳咗。」這觸發他們推出習俗「實用手冊」的念頭，讓大家有指引可跟從。

團隊暫時只發表了一篇殯儀實用文。文章簡短，未必能使讀者了解整個儀式流程，但對年輕人來說亦不失為有趣的「冷知識」。

各處鄉村各處例　儀式考證難度高

他們慨嘆風俗與傳統出現斷層，並不全然出自年輕人的問題。「好多老人家一嚟唔識表達，二嚟可能覺得儀式細節係常識，一心以為大家跟佢做咗咁多年就一定識，最尾咩都無講低就走咗。」結果後輩想做也做不了，無奈只能訪查街外人和翻查資料。可是，宗教流派太多，每個宗教場所（如寺廟佛堂）的處理方法總有差別，加上民眾會根據各自的生活習慣把習俗儀式略為改動，經過多年口耳相承，民間和宗教團體中衍生不同版本的造法。

「就算大家都喺香港大，唔同族群之間嘅文化習俗已經可以好唔同，都唔好話分到邊條村咁細，就咁潮州人、客家人同圍頭人嘅做法都可能有差別。大方向或者係差唔多，但總有啲細節係唔同。」

他們直言，這令考證變得困難重重，也難以定論哪個「門派」才屬正宗。「先攞個standard作準則會好啲嘅，所以會問番師傅一般情況係點做。不過尋根某程度都係追番自己家族嘅嘢先最有意義，所以我哋好鼓勵大家對自己屋企了解多啲，先由自己出發。」