《廣告牌殺人事件》如果廣告牌可以申冤 香港會因而陸沉？

如果豎起廣告牌可以申冤，可以逼令當局查案落力啲，我諗香港可能會出現足以令這小島陸沉的無數廣告牌。不過「豎起廣告牌可以申冤」前提係被申訴對像還有廉恥，會覺得大大隻字被數落好羞家先得。可惜香港太多人賣咗靈魂畀魔鬼，廉恥？送埋㗎。

離咗題，講番《癲狗喪七》(Seven Psychopaths)導演Martin McDonagh套新戲《廣告牌殺人事件》(Three billboards outside Ebbing, Missouri) ，戲名有少少引導人以為有廣告牌冧落來殺咗人，其實係有單謀殺懸案，先有呢幾塊牌。主角係一位失婚婦人，佢為咗幫被殺嘅女攞番個公道，買起三塊廣告牌指名道姓責難警長：點解成年仲未拉到兇手，你係咪失職？奧斯卡影后Frances McDormand高清示範眉梢鼻翼嘴角都識做戲嘅神技，佢嗰種「我驚你有牙呀」嘅勇猛、「我誓死捍衛嗰三塊牌」嘅霸氣、「我理得你班人講乜」嘅架勢，都深深咁吸引住我。佢近乎有晒beat rap住鬧嗰個唔同意佢咁做嘅偽善神父時，實在型到地動山搖。佢穩奪金球獎最佳女主角，能否再獲奧斯卡肯定就要拭目以待。

Frances McDormand單人匹馬向司法制度挑機，看似勇悍，實質靠「尋真相」意志支撐隨時崩潰粉碎的自己，睇到人好神傷。電影可以相當煽情俗套，但唔玩催淚，靠人物塑造功力及精煉對白令觀眾心生同情，更高手。成套戲如烈酒一樽，嗒落竟然似碗回甘涼茶。

由於佢劍指嘅係德高望重嘅警長Woody Harrelson，成個鎮無人支持佢咁做，連佢個仔都覺得點解仲要不斷挖深個傷口。一個人vs全鎮人嗰種勢孤力弱，遠遠唔及死咗個女來得咁痛苦揪心。喺嗰三塊牌下面對住隻鹿自言自語，吐露心事一幕，完美演繹個心穿咗個窿到底係點。

雖然佢講嘢mean到裂開，但知道警長身患絕症，立即流露同情目光，本性善良係你把口幾衰都掩飾唔到嘅。呢套戲幾位主角無人100%善，亦無人100%惡，都只係被現實、教育與制度搓圓㩒扁嘅低端人口。你開頭可能唔多鍾意Woody Harrelson，去到中間會覺得佢嗰種心思細密，觀人於微，真係好charm。

後半部分劇情太多巧合，好彩不斷有無定向黑色幽默令瑕疵唔多覺眼。電影本質係一部童話，相信人間總有美善，只係表現手法比較暗黑。結尾嗰種無奈夭心夭肺，但人生本來就係咁，出咗半斤力，未必攞得番四両。孤單的Frances McDormand透支自己出咗百斤力，換來同路人，寂寞減半，又多一個活下去嘅理由。

圖：電影劇照