【編按】港產片於九十年代最輝煌時期年產超過200部，回歸後產量驟減，「東方荷李活」之名漸漸褪色。2016年的62部跌至2017年的53部，可預計未來的產量會跌穿40部。
港產片產量持續下降，業界幕前幕後湧上內地拍大片，合拍片的票房輕易過億，坊間都擔心「港產片會有消失的一天」。不論是王晶的「只有華語電影」論，還是成龍「現在只有一種電影叫中國電影」的說法，都否決香港電影仍然存在。
「沒有港產片」之說不但再次掀起「港產片何去何從」的討論，亦令新一輩電影人重新檢視香港電影本土元素如何打破國界。香港電影真的要「搣甩港味」才可走向國際？
香港電影歷史悠久，由50年代歌舞片的葛蘭，70年代輸出Martial Art 哲理的李小龍，洪拳代表有劉家良，邵氏電影《獨臂刀》紅至日本；近代藝術代表有王家衞，荷李活甚至買下香港的《無間道》劇本拍成美版；日本名導是枝裕和以《十年》戲名重新編寫劇本，給新晉導演預言日本未來。如果完全否定港產片，似乎中國電影也談不了下去。
自從數年前「首部劇情電影計劃」推出，港產作品少了合拍片的商業味，多了人文關懷，對社會事件也有着墨。今屆（第四屆）大專組得獎者黃綺琳認為新晉導演多為電影學院畢業生，學的是法國新浪潮電影，比較理想主義，所以取材偏向社會性。她笑謂：「有人形容呢啲戲好『港台』，有啲導演好唔鍾意人咁講，覺得係笑個故事悶。我又無所謂，起碼好過TVB同亞視。我覺得許鞍華都好『港台』㗎！電影如果唔貼地，唔係關心本土人民嘅話，冇乜意思。」娛樂性與社會性非二元對立，重點是創作人對所處城市有觀察有體會，製作的電影才有血有肉，但黃導補充一句：「我都可以好商業嘅」。
地方色彩可國際化
只要作品真誠，小情小趣一樣可以引起世界關注。「我好鍾意印度電影Lunchbox(《美味情書》)，講佢哋點樣運輸飯盒。呢樣係佢哋一樣好細嘅文化，我覺得好有趣，好特別；又例如《伊朗式離婚》、《伊朗式分居》好反映當地文化同宗教背景。呢啲戲參與好多影展，令好多外國人認識佢哋嘅文化。」2013年憑「鮮浪潮」短片《落踏》參與過意大利烏甸尼斯影展的她，發現當地有一大堆喜歡港產片的影迷。「佢哋好熟悉香港90年代嘅電影，又會留意香港最新上映嘅戲。我嘅畢業作品《赤鱲角到天水圍是我愛你最佳距離》都去過法國參展，佢哋對香港呢個亞洲城市好好奇。」中國市場的確好大，但放眼望去，世界更大。
「首部劇情電影計劃」出了多位「風格導演」，例如黃進、陳志發、譚惠貞等，取材貼地有共鳴。「唔夠資源，就會變得有風格。當製作費好充裕，大家拍出來可能反而好相似。」無米考起家嫂，無錢自然逼出創意。
碌人情卡拍膊頭，是香港電影的悲情浮世繪。計劃開初只贊助200萬，製作費緊拙，講述打棒球的《點五步》，好多羣演都靠大學生義務上鏡。拍電影人力物力不少，器材及場地租金、交通費、演員及工作人員薪水、後期製作費等，資金眨下眼就無。有見新晉導演個個十個煲得九個蓋，今屆大會把大專組資助金額增至325萬。黃綺琳媽媽得知後，反應諧趣。「佢同我講『有325萬，梗係唔好拍戲啦，輸死你，賺唔返㗎，梗係買債券』。」
黃綺琳準備今年年底開拍首部作品《金都》，故事發生於以婚嫁為主題的「金都商場」。「我住喺太子，好想講關於太子嘅故事。金都商場冇豪華或夢幻嘅感覺，反而好廉價好貼地。我對呢個商場一直好有興趣。」主角三十歲出頭，到了所謂的適婚年齡，旁人都追問何時結婚。「男女主角都喺金都商場工作，女仔喺婚妙店打工，男嘅係婚禮攝影公司店主。十年前個女仔為咗錢，同過一個大陸人結婚，一直未辦妥離婚手續，處理假結婚過程，佢反問自己係咪一定要結婚，成就所謂嘅大團圓結局。」電影涉及中港婚姻，無可避免地有大陸人角色，她覺得不易剔除，也不必迴避。「我曾經有concern如果部戲有大陸人，觀眾會唔會以為我想打入大陸市場？不過我寫假結婚呢個題材，根本入唔到大陸，因為大陸人係『唔會』犯法，大陸亦都『冇』社會問題。」電影會於金都商場實地拍攝，她慶幸業主支持電影製作。
中國市場淘金夢？
黃綺琳為ViuTV寫過大熱劇集《瑪嘉烈與大衞之綠豆》劇本。這個經驗讓她更肯定本土作品一樣能合大陸觀眾口味。「佢哋幾鍾意呢個劇，喺大陸一啲網站評分幾高。我哋完全冇刻意針對大陸市場，做一啲好中國化嘅題材，只係做好個劇集。」《綠豆》編劇的身份，為她帶來撰寫大陸劇集劇本的邀約，但她最終放棄了。「劇本費比香港真係多十倍，但呢啲錢唔係我賺㗎﹗我唔識寫地道普通話對白，唔了解佢哋嘅社會文化，即所謂嘅唔夠接地氣，所以我最後我無接到。」她強調香港也有很多機會，只是大家沒留下來。「我唔會因內地觀眾數量多，就放棄本土題材。大陸市場有啲似我哋以往講去舊金山掘金，人人都話嗰度有金，但有邊個掘到？你又無真係識人因為咁發達。」
雖說香港電影工業不景氣，產量大幅下滑，但新一代入行可參加比賽當捷徑，贏出還有政府資助。這是最壞的年代，這是最好的年代。「前輩睇我哋呢一代，會覺得『門檻好低』，咁容易你就可以做導演。你得唔得呀？」上一代電影人大多「紅褲仔」出身，在片場由副導演或攝影師做起，儲夠經驗與人脈才能執導演筒。直率的初生之犢說：「質疑歸質疑，如果我哋真係做到成績，就解答到佢哋嘅問題。」
港產片趨向自編自導
「首部劇情電影計劃」讓參賽者用劇本競賽，入圍故事都有一定水準。「唔係擦鞋，計劃真係好好，好多前輩導演都想當年有。用劇本參賽，係一個比較公平嘅方法，亦都可以畀本身任職編劇嘅人嘗試做導演，拍自己寫嘅故事，例如前兩屆嘅譚惠貞(《以青春的名義》導演) 本身都係編劇。」
以往編劇拿劇本給投資者看，他們如覺滿意，傾向買下劇本，再找一個有名氣的導演執導，新人很難有機會自編自導。「不過編劇變導演最大問題係太理想化，你識戲劇結構但你唔知現場運作，紙上談兵，相對科班出身嘅，執行力比較低。」她慶幸計劃讓電影人零包袱創作，因為即使最後票房失利都沒關係。首部作品有政府扶持，第二部作品才見真章。「之後就真係要靠自己。 我覺得只要你努力拍，就唔會變一片導演。電影好客觀，唔會明明你拍得好，全世界覺得你唔好，好公平。」
贊助港人睇港戲
港產片近年不論有甚麼口碑之作，總有人擺出「我唔睇港產片」的自鳴得意貌，老中青都有這類人，彷彿聽到螢幕中的人講自己母語，就會發冷冒汗心悸，以證自己品味高尚。「我算係怪胎，細細個就好鍾意睇港產片，係我唯一完全明白嘅電影。」愛還愛，她倒好理智。「有啲香港電影真係製作得唔好，好似未完成咁，都會覺得恨鐵不成鋼，會戥消費者唔抵，荷李活大電影又係八十蚊，呢套又係八十蚊。」觀眾時運低入場看過港產爛片，真係搵槍指住頭都唔想再入場，一竹篙打晒一船戲。她建議政府考慮資助香港人入場觀賞本土電影。「四十蚊睇一套港產片，佢哋會比較願意，睇完可能覺得唔錯，有共鳴。可以為港產片開發新嘅觀眾群。」
電影工業不似以往輝煌，從業員一個個轉行。「之前做資料搜集，訪問過一位在機場停機坪操作機器嘅技工，佢以前係王家衞電影嘅剪接師。」資深人與新鮮人更替當然正常，黯然離場才叫人神傷。不過即使電影業如何衰退，黃綺琳覺得香港電影始終不會消失。「依家拍片好方便，即使沒有工業電影，拍開網絡電影嘅一樣可以拍長篇電影，搵場地放映，唔一定喺傳統戲院放。總有唔同形式可以令香港電影繼續落去。」還望本地電影港味依然：實地取景，本土演員，粵語對白，不用硬跟主旋律，一樣奏得鏗鏘。
