大時大節，別以為圍村就只得盆菜和炒米餅，其實還有極少人知、近乎絕跡的節慶糕點，名叫手粉。它比糖環更加難尋，要用人手慢慢搓至細滑，蒸出來的手粉「柔軟得來又帶煙韌」，其他糕點難以比擬它的滋味。可惜現在家中還有大灶頭和手粉格的圍村人所剩無幾，只有老一輩仍默默記住這門手藝。
梁少霞 （能娘）住在粉嶺龍躍頭，閒來便做一底手粉送給家人兒孫，這是她對手粉的點滴記憶：
「以前無得食，無得你揀就咩都覺得好食。材料來來去去都係嗰幾樣，但樣樣都要自己落工夫。粉係用自己屋企種嘅米樁成，以前家家戶戶都有碓坎，個個都會樁。我記得舊時由穀磨去糠皮後，米係白得來帶淡黃色，唔係依家漂嘅嗰種白。至於糖，以前都唔係用白砂糖，係用黃片糖壓醉；細個娘家種蔗，用屋企自己燒糖，淨係磨蔗都要六隻牛去拖個磨。」
「食手粉時，我會諗起阿媽和阿嫲。我阿爸有七個仔女，我排第四。我好細個，六歲時就無咗阿媽，腳下仲有兩個妹。嗰陣無阿媽，嫲嫲又老，無咩人整嘢我地食。放學返來，見到隔離叔婆留定冷飯係鑊頭等佢細路下晝回來有得食，我和阿妹兩個就自己挖兩條生番薯坐在門前吃，覺得好淒涼，成日都喊！到老豆娶到填房，我地先有好日子過。呢個阿媽雖然唔係生我地出，但對我地好好，好錫我地。我唔使點做，係睇住阿媽（後母）和阿嫲一齊樁米做手粉，成日望到就記得。」
手粉的主要材料是糯米粉、粘米粉、白砂糖、花生、椰絲和芝麻。先加水將糯米粉和粘米粉拌勻，用手扛搓至細滑，用手按實後放置四、五小時，之後過篩，並將粉倒進手粉格。用手指在粉中畫圈，預留位置放入餡料。每格放進若一個約一個掌心的分量，最後鋪上一層粉，用木條撥走多餘的粉。把手粉隔水蒸約二十分鐘，最後可加上花紅粉點綴。
能娘笑說要吃手粉就到明愛去找她。欲了解圍村手粉技藝的有心人，不妨就趁新年去跟她拜個年。
