在學時修讀應用及媒體藝術的本地紙藝家紅彤彤，畢業後也曾為生活奔波勞碌。一次台灣之旅，她接觸了古法造紙術，在拜師的過程中，深深被造紙師父的「紙匠精神」感動。回港後，她毅然放下全職工作，學習做一位紙匠，並於2014年創立「浪花花」紙教室，決心將造紙工藝傳承下去。三年間，她舉辦過無數工作坊推廣紙藝，今次她卻換個形式，以個展把紙的美學發揚光大。
「每種工藝都有佢嘅歷史，好似造紙工藝呢種非物質文化遺產，經過二千幾年嘅沉澱，世代相傳至今依然未被淘汰，可見佢有無可取替嘅價值。雖然毫不起眼，但佢的確無處不在。老套咁講，銀紙係紙、廁紙都係紙，我哋每日都用，但就無咩人考究紙係點製作。」要知道工匠需要花上很多時間和心血，才能製作出質感強烈且獨一無二的手工紙，透過把植物纖維拆解再重組，當中盛載的不只是一份對文化承傳的堅持，還有藝術家與生活間的連繫。
她認為都市人與大自然的關係愈行愈遠，生活像是缺乏了溫度，因此希望以個人經歷喚醒觀者，反省生活與生存之間的分別。「三年前我以旅人身分學造紙，最後決定全身投入呢門手藝，當中嘅經歷同感受，我都想同大家分享。」尤其在功利行頭的商業社會，人更容易迷失。紅彤彤明白好多物件嘅價值不止於價格，所以想藉工藝帶領觀者以更廣闊的角度欣賞事物的本質。「唔係所有嘢有錢就買得到，背後好多啟發人心嘅功夫同故事都係無價。」
是次展覽將會分成五大展區，除記錄了紅彤彤學習紙藝的心路歷程，亦會展示她的藝術創作和基本的紙藝教育。「有個叫『紙林』嘅展區，展示咗四幅我創作嘅畫。另外有個展區叫『紙的觸感』，係俾入場人士伸手摸紙。有別一般嘅展覽，通常展品係唔俾掂嘅，但我覺得紙係要透過觸碰先有所感受。同場亦都會展出各種原材料同工具，更會介紹造紙嘅八大工序，解釋造紙流程。」
收集咖啡店廢料 體驗環保造紙
嫌用眼睇用手摸都未夠喉的話，大家不妨參加造紙工作坊。當年紅彤彤在台灣學藝，主要取材於樹皮，但香港連樹都特別少，要收集樹皮簡直難過登天。於是，她著手尋覓不同的纖維物料取而代之。「其實唔少行業經營時都會製造大量廢紙同廢棄物，所以我就諗，與其送去堆填區，咁點解唔將佢哋循環再用，製成再生紙。」今回，她特別選用咖啡室廢料。「咖啡店本身有好多合適嘅素料，例如純白牛奶盒、濾紙、咖啡渣以及貌似花生衣嘅咖啡豆銀皮，都可以提升手工紙質感，營造獨有嘅顏色同紋理效果。」紅彤彤期望體驗班能夠加強參加者的環保意識，實踐廢料再造，為事物重現價值。
「我哋會由處理原材料開始教起，每個工序都會示範，確保大家返到屋企都可以認用到。」她深信單次體驗並不足夠，要令社會真正減廢，日常生活都要持之而行。「就算屋企無咖啡廢料都唔緊要，因為可塑之材一地都係。例如包裝飲品，飲完可以留返嗰盒。硬卡紙類嘅包裝盒纖維勝在夠高，打碎之後一樣可以用嚟造紙。」不過作為環保追隨者，她補充最治標治本的方法是避免使用包裝盒。「教班時我都會提醒大家，千祈唔好為咗用個包裝盒造紙而消費，因為咁樣嘅觀念係本末倒置。真正嘅環保減廢，係要減少使用有包裝嘅產品，無論紙定係膠都要免得就免，咁先係對環境有幫助嘅。」
《紙的溫度》紅彤彤個人展覽
日期：2017年11月12日 – 12月17日
時間：平日需預約參觀時間、逢星期六12:00 – 18:00開放予公眾、逢星期日休館（除12/11及17/12外）
地點：概念士多 concept store（九龍聯合道135號香港兆基創意書院地下）
《惜物原創》調和過的咖啡明信片杯墊工作坊
日期：2017年11月18日（星期六）
時間：13:30 – 15:30 ／16:30 – 18:30
地點：概念士多（九龍聯合道135號香港兆基創意書院地下）
費用：每位 $350（包飲品一杯及蛋糕一件）
報名截止日期： 2017年11月15日（星期三）
報名詳程及方法：網上提交報名表格
