殺無赦點譯好 港大研發時事詞彙app有答案

經常聽到的新聞詞彙，英文到底要點講先傳神？Newssary app不但提供翻譯，而且詳列出處，甚貼心。

新聞字詞增長快過火箭，記者曾被不懂中文的朋友問起到底新聞主角講乜。嗰一刻，我，口啞了。到底英文應該點樣樣講？走去查英文傳媒如何演繹先開得番聲。幾日前我知道有個叫Newssary的app，七千幾個時事詞彙英文翻譯一search即有，感動到想來一場北韓式哭泣。

Newssary就是news與glossary的結合，app由曾任法庭傳譯主任的港大學者吳雅珊博士與研究助理研發。除了中英對照時事詞彙，仲連潮語及俗語都有，分了十一大類，而且還列明詞彙出處，方便到不得了。吳雅珊說：「App內的字詞唔係我哋譯，我哋從傳媒搜集英文翻譯，選擇最好嘅放入去。例如『殺無赦』，有傳媒譯kill mercilessly，太拗口；另外有傳媒譯kill without mercy，就傳神啲對等啲。」

吳雅珊表示英文傳媒普遍喜歡保留中文詞彙的地道講法，例如「辣招」會譯為”spicy” measures，「納米單位」譯作”nano” flat，寧願加引號，較為傳神，有上文下理，讀者也不難理解。

詞庫當中連「摸底」都有，翻譯為soft lobbying，卻曾被毛孟靜質疑譯得唔夠精準。「摸底好地道口語，soft lobbying好正式，的確唔對等，但政府文件咁樣用，我哋要忠於佢。又例如『衰仔紙』(不供養父母證明書)，英文係bad son statement，有人問點解一定係son唔係daughter，但其實咁樣連中文都要改。由於政府新聞公告都咁用，我哋就跟番。」她又提及很多大中華新聞詞彙，內地譯法普遍出錯，遇到這種情況，團隊會從其他相似新聞找出對應翻譯。

詞庫非一日建成，源起要數2003年沙士。「當時要停課兩星期，我要讀即時傳譯嘅學生搜集與沙士有關嘅新聞字詞英文翻譯，因為嗰段時間好多傳媒發布會，好多消息，之後我就整理字詞，再上載到個人網站公開俾大家用。」由於同時美伊戰爭爆發，她要求另一班學生找有關戰爭的字詞。「App內有好多軍事用字，例如地對空導彈嗰啲。」經過逾十年整理，至2014年他們已儲到近五千個詞彙，她決定申請校內資助，把成果製成方便使用的app。

App還加有小遊戲讓大家邊玩邊認識詞彙，唔想被問到靜過太空，可下載使用。