去頒獎禮，如果你拿了一個獎之後，換套衫才回到座位上，一定會俾人鬧「你明知自己實仲有獎㗎？造馬㗎？換定衫咁老定？」喂，大佬，可不可以是我敬業到唔知有無獎都換定先，「just in case」我仲有獎要上台，咪多套衫俾觀眾睇囉！（道理同「唔知我有無機會表演但都練定歌排定舞」一樣啫！）喂，你估買多套衫唔使錢呀？（就算借多套衫都要找多次stylist張單啦！），我而家冒住嘥多套衫錢嘅危險，都預備多套（唔知有無得上台俾人見到嘅）衫來entertain你喎？豆零都唔使出嘅你不單止唔讚我敬業仲鬧我「坐定粒六」太自大？無嘢呀？

所以我是那種看見別人Red Carpet完換了衫才上台表演或者在台下坐着睇吓仲使唔使上台時，一定不會話「唓，當正自己fashion show咩！」或者「博搶鏡咩！」那種冷血薄情的Haters !

作為一個工作與時裝有關的個體戶，我心裏非常願意，為客戶和觀眾多轉幾個造型「益街坊」，但近年有些場合我偏偏是相反地「盡量打甩希望唔使換咁多套」。

非因孤寒，苦衷有二：一，搵一套夠靚的衫連襯啱晒配飾妝髮其實已經好難，帶多一套事前準備時間便至少加倍，這也不是問題，問題是我這種助手也沒有的one-man-band如何獨力抬8個造型的衫褲鞋襪去柴灣影樓或者西貢片廠開工呢？就算有crew車接我都未必有本事一個人執齊一噸衫自己搬落樓下。

況且，有人喜歡著一套精心挑選超級滿意的衫成晚唔除，也有人鍾意靚又換啲唔靚又換啲每五分鐘出一套總之一味要多！

二號苦衷是，若服裝是生財工具capital之一種，著一套衫和換九套衫價錢不可能一樣，合約訂好包幾多個造型便最好遵從，為了工作效果好我多送你一兩個extra look是人情，拒絕無止境的百變要求也有我的道理，否則對其他客戶也不公平吧？所以說，換衫方面，還望理解有時也不是你想大方就可以大方的。

工作上被迫（中途）換衫

在工作場合不情願地要中途換衫的，也沒有你想像中罕見。

有次參加時裝品牌活動，在後台stand by等出場時才發現和另一位男藝人撞衫，品牌方面負責統籌的是位欠缺經驗的新人，硬推說明明唔同，我說同pattern同顏色同cutting，如果一件V領一件圓領都算唔同的話，那麼你當我份人麻煩吧，反正這種情況，無論撞衫的對方是大明星小明星，年紀輩份粉絲量比我大還是小的人，我都不會要求人家換衫而自己偷偷換掉便了事，若對方自覺比你「大」自然不會相讓，對方就算比你資歷淺我也不想惹來口實話我「大蝦細」，所以我都是禮讓一下自己默默換衫便可以了，反正那次場地是時裝店，全店都是衣服，我去換好了，不用驚動別人！

另一次是多年前還在做電台DJ時，某歌手打算在紅館開個善慈籌款音樂會，中段需要司儀報幕及玩遊戲chit-chat，便邀請我去幫忙。

既然是charity，當然沒有報酬，還要自貼時間、車錢和服裝的，但我OK呀，略盡綿力何足掛齒。

開show當日下午五六點，歌手經理人來我化妝室say hi說了兩句感謝的客套話，又閒聊一下「你今晚著咩呀！」我指指衣架上的X牌see through T恤，對方看了一眼便沒事一樣離開。

五分鐘後，歌手的助手來敲門，問我有沒有帶備多一套衣服，因為歌手（今天的8套衣服中）有一套服裝和我同牌子，想我不穿這套穿另一套！沒有帶備的話便最好馬上飛車回家攞！（潛台詞我feel到是「我唔理吖總之你自己死掂佢啦」！）吓？細問之下，甚至不算撞衫，因為只是同牌子同樣透明衣料，款式顏色形狀圖案都不同……

有些基本的待人接物，有時候我們以為很簡單，原來很多人連這樣顯淺的分寸都不會。一，你那麼怕撞衫，早點問我穿什麼「夾」一下呀，得返個零鐘便開show你叫我去哪裏屙多一套衫出來？二，真金白銀付錢我來打工還得互相尊重，何況我今天是嘉賓免費來義助你，稍為知書識禮的人，處理方法都會是「那麼我換走一套，你不用換」反正我預備了8套，況且又不是100%撞，而你也沒有夾好了場景和dancers，為什麼不能臨時抽走那套衫？……除非，除非有人覺得我係大明星，即使搵你笨要你來當免費勞工也是「益咗你」「俾機會你」，否則這種不近人情的要求也真的說不出口吧，如果你請了個比你紅的歌手來做嘉賓而撞衫，你估你夠唔夠膽叫佢即刻飛車返屋企換過套呢？

如果真的有多套士啤登台服也許我當時真的會大局為重因為那個greater good而忍你一嘢吧，可惜那天我真的沒有中場換衫的本錢，所以也只能禮貌地告訴來人：「咦我無第二套可以換囉喎，唔想撞衫的話，有無興趣換走個MC呢！」都算大方得體啦呱！

（全文完）