粵曲帽飾大師自創新款盔頭　可拆式設計深得老倌心

陳國源坐在擺滿自家製盔頭的展示櫃前，滿臉自豪。

粵曲戲服大師陳國源（下稱源哥）在戲曲界打滾數十載，最初以演員身份出身，機緣巧合下遇到帽飾恩師而中途出家，「轉行」製作粵劇盔頭。雖然正值耄耋之年，八十有六的源哥執起針線珠扣依舊不遺餘力，話說當年依然中氣十足。

遇上啟蒙恩師　轉戰盔頭工藝

「最初我係科班出身（註1）做演員，拜黃少伯為師學做戲。舊陣時個個都係由兵仔起手，即係所謂嘅『紅褲仔』（註2）。不過做咗五年左右，我就轉做幕後喇。」由幕前退居幕後，源哥笑言自己並沒有正式跟師父學做頭飾，只是緣份讓他遇上啟蒙老師，成為他人生的轉捩點。

「我未入戲行、仲喺普慶（註3）橫巷做小販嗰時，就認識一個當時好巴閉嘅名牌頭飾師傅包祖良，好多大老倌包括任劍輝同林家聲都指名要搵佢做。佢好叻㗎，十四歲入行，十六歲都未學滿師就掌管一間好大嘅盔頭舖。」他憶述，人稱「和尚」的包師傅為人和善，亦樂於分享獨門絕技，他從包師傅身上獲益不淺，「本身以為自己淨係鍾意做戲呢行，頭飾開初只係想順便學埋。佢一面做，我就不斷問，佢全部都答。你知喇，好多師傅唔肯講太多㗎嘛，而且連我自己都仲未搞清楚原來對呢個行頭有興趣，但佢就發現我有呢方面嘅天份，祕訣都願意講俾我知，其實好似同做我師父差唔多。」

是次展出的作品多半是源哥近年的得意之作，以新款式居多，但當中亦有從北美洲帶回來的客製收藏品。他表示，不少非戲曲之人也視盔頭為藝術品，並將之買回家珍藏。

初出茅廬　獲新馬師曾垂青

源哥不但在戲行廣結善緣，也從包師傅身上得到啟迪，加上熱愛研究戲服文化，使他於上世紀五十年代初出茅廬之時，手藝已獲一眾名伶垂青。「首先幫襯我嘅有新馬師曾、鄧碧雲、陳錦堂、任冰兒、李香琴同南紅，佢哋最賞識我在先。我仲『趯』兵仔嗰陣同佢哋同台演出過，建立咗些少交情，加上當時又有當紅衣箱師傅（註4）黃安推薦，所以一見我轉做頭飾就搵我。」正所謂酒好不怕巷子深，他憑雙手在行內打響名堂，其他大老倌如梁醒波和半日安等人也鼎力支持。

不過，源哥自問不敢高攀為包師傅的入室徒弟。「到佢逝世當日，佢都未認過我做徒弟，我亦唔敢認佢做師父。」他怕自己配不上名師，卻未有預料包師傅一家早已視自己如門下高徒。「後來佢太太同長子掌管番佢盤盔頭生意，當時我都開始咗整頭飾好一段日子，遇着佢哋人手有限做唔切，就舉薦客人去我到做。以前逢人幫襯我梗會問吓邊嗰介紹嘅，可以多謝番人哋啊嘛，點知從客人口中先知包師傅一家都叫我做徒弟，叫大家搵我幫手。」一個簡單的稱號，一段亦師亦友的情誼，為源哥打了一支強心針。

源哥將大半生奉獻予戲曲盔頭創作，作品不計其數，每頂更需動輒十至十五天來製作，一雙巧手每個月就只能出產兩件頭飾。

自創可加可減設計　助演員慳錢省位

源哥最初以花旦散件花頭飾起家，後來越做越多，涉獵的帽飾種類越來越廣，手藝亦達到登堂入室之境，於是便大膽加入自己的創意，研製一套獨特的製作方式。他認為如此貼身的用品，除了美觀，舒適輕便也相當重要。

昔日製作盔頭的材料限制多，以舊式銅鐵作帽坯，製成品笨重之餘，亦不好收藏。源哥於是以傳統技術為基礎，再予以改良，改用更輕巧的物料取代銅鐵，成功設計出「可加可減」的款式配搭。「講嚟講去就係『變化』兩個字。好似起樓咁，地基結構就跟足傳統咁起，但裝修粉飾就會革新。我學我師傅一樣，選材夠日新月異，而且要夠物盡其用，買到咩材料就用咩。最緊要做出嚟夠輕盈，戴起嚟先夠舒服。」

花旦散件花在行內有較多人製作，因為技巧相對簡單，比較容易上手。

問及頭飾豈能使出「可加可減」的變法？源哥立即雀躍地指向陳列櫃內的文武髻。那是一件由文髻和武髻二合為一的盔頭，由源哥於七十年代為名劇《戎馬金戈萬里情》而發明，自此源用至今。演員可按照不同的戲曲場合而選擇拆開或合拼使用，同一組頭飾可以應付四、五個造型，既慳錢又慳位。「單戴一個髻可以用嚟做神仙、公主、郡主，皇后都得，加個額（武髻）就插得雞尾，當七星額用。」他舉例說，演員如果需要四頂盔頭，每件三千，那就得花上過萬元，而且需要租更大的倉庫安置衣箱擺放頭飾。如今入手一件便能變出四件，一來容易儲存，二來價錢更相宜。

把文髻（左）和武髻（右）分拆開，便成為兩件獨立的頭飾。

這種活動式盔頭史無前例，一出品就深得演員鍾愛，源哥於是以同樣的概念套用在各式頭飾上，使之更靈活多變。「我又將男裝武將嘅盔頭改裝，逢有盔尾都加入一對盔頭帶，呢樣係以前無嘅，因為帶同盔頭水（流蘇）一樣，都可以帶動演員嘅姿態入戲，睇起上嚟更有架子氣派。對帶好生（靈活）㗎，用魔術貼癡住，鍾意就用，唔鍾意就拆。」

源哥解釋，每件頭飾都按照客人的要求和喜好量身訂造，客人假若負擔得起，他甚至會從外地選購寶石珠飾作素材，務求讓作品戴起來更華麗。

有些客人礙於居所空間有限，特意找源哥製作袖珍版頭冠作為擺設。

青黃不接　徒弟難求

源哥難得一身好本領，承傳卻始終闖不過。多年來他不時開班授徒，徒弟收得多，但無奈未有一位能夠堅持到底。他慨嘆在粵劇盛行的年頭，憑手藝不難維生。但數十年過去，雖見證粵劇被列為非物質文化遺產，卻眼睜睜看着戲曲文化的衰退，盔頭工藝亦難以為繼。「舊時做五十蚊生意，賺十幾蚊。呢十幾蚊幾好用途呢？一餐飯五毫子就有叉燒飯一碗，兩毫子白飯咁就夠一餐，即係一日個四銀錢，嗰陣你賺到十幾蚊經已幾好㗎喇。」

他慨嘆如今粵劇不如流行歌手般普及，行業入息不多，因此也無法關顧戲曲盔頭及服裝行業。老師傅越來越少，年輕一輩也沒有入行的衝動。「依家好多人嚟學，尤其有啲唔使番工嘅女士，退休就嚟學吓，但我估計無幾多個想入行用嚟搵錢，因為時間耐啊嘛。大部份都係貪得意旨在體驗吓頭飾嘅製作過程。」源哥解釋，市面上比較多人製作散花，因為技巧相對簡單，而礙於大型帽飾有一定規格，製作需時，非常考驗心機和耐性，能夠應付自如的盔頭師已所剩無幾。

舊年代的長輩對隆重場合非常重視，從源哥講究的衣飾打扮，不難看出他對美學抱有一份執著與堅持。

● 註1：加入戲班接受正規訓練。

● 註2：由基礎做起的唱戲小演員一般也穿紅色褲子，因而得名。

● 註3：普慶戲院的簡稱，位於油麻地彌敦道380號，於1930年代開業，80年代末改建為現址的逸東酒店及普慶廣場，曾一度在廣場的迷你戲院繼續營運，直到00年代初正式結業。

●註4：主理演員戲服及道具的戲箱助理。

(部分圖片為官方圖片)