九龍城衙前圍道／賈炳達道重建計劃甫公布，不少人已開始擔心區內店舖往後的去向。老店店主看盡區內變遷，重建公布後，他們都不約而同地顯得淡然。走訪嘉倫文具玩具精品、北記五金行、金麥泰泰國菜館，他們的負責人對重建有何看法？這幾家老店可是你回憶的一部分？
嘉倫文具玩具精品
地址：九龍城衙前圍道66C
簡介：七十年代，何老闆已在九龍城開設文具店。後來，他在一九八〇年買下現在衙前圍道的舖位並遷到現址，經營文具精品生意。
Q：如何看待重建？
A：我是這裏業主來的，重建都沒什麼打算，打算退休吧。
Q：會否對無法繼續經營感到可惜？
A：以前啟德機場還在時，很多遊客和公司員工特意來買文具的，平啊嘛，但現在大家都上網訂購，不會有人專程來買。做到咪做，到時做唔到咪算。不過，舊區係應該重建嘅，好似個計數機開舖用到依家都壞，入唔到數，都留唔到幾耐，只係自己無得再做下去，咪提早退休。
北記五金行有限公司
地址：九龍城南角道52號
簡介：店舖於一九七六年開業，為區內規模最大和歷史最長的五金舖之一，由劉小姐的父親和叔叔拍檔開立，主要為商戶提供五金材料，同時亦設有零售。劉小姐的父親退休後，她接手生意，和其叔叔一同經營店舖。
Q：會否打算在重建後重開店舖？
A：都要睇政府賠償方案，同埋搵唔搵到地方，但暫時都想繼續做嘅。始終都做咗咁多年，又有我哋啲後生接手，加上依家五金舖都真係唔多，只不過如果到時俾人逼遷，新嘅地方又好貴租，或者伙計又老，未必肯同我哋去新環境，都要視乎情況，見步行步啦。不過都傾向開返嘅，好似我阿爸阿叔咁，成世都做呢行，你叫佢唔做，佢真係唔知自己可以做咩。
金麥泰泰國菜館
地址：九龍城南角道34號
簡介：店舖於一九九〇年開業，老闆為泰國華僑，現由家族第二代水哥接手經營，店舖為區內首批泰國菜菜館。
Q：如何看待重建？
A：每個舊嘅地方都應該要重建嘅，只不過我哋依條街就被選中咗，但我哋做咗咁多年都會唔捨得，諗住屯馬線開生意會好，但好唔夠一陣又要搬。
Q：會否打算在重建後重開店舖？
A：會的。就算完成重建，我哋都未退休得住，仲要養家，之後都可能會開返喺九龍城。我哋好多客人話你千祈唔好去其他地方啊，開返喺度啊，我唔識去㗎。佢哋都習慣咗我哋喺度。
