趙榮德專欄：退休後遺症

人的行為，深不可測。為何這樣說，因為有個朋友所做的事，十分不理性，他自己本人也覺得莫名其妙，但他卻做完又做！

話說朋友是學校高層，五年前退休，理應「棚尾拉箱」，把學校所有「舊文物」拋掉。但他卻把這些舊東西儲存下來。第一年，我問他是否把所有放在學校的東西存放在家中。

「我屋企冇咁大，我執下執下，足足執滿了五大箱。我想把這五箱拋掉，但諗下諗下，都係唔捨得，我驚有啲重要嘅文件，拋棄之後搵唔番，所以我將呢五大箱『舊文物』放在迷你倉！」

「放五箱『 舊文物』在迷你倉，幾多錢？」

「唔平㗎，一個箱一千蚊一個月，五箱便要五千蚊！」

「嘩，咁一年豈不是要六萬幾銀，咁你呢五年有冇去整理下啲古董，將佢化整為零？」

「冇呀！」

朋友已把「古董」放在迷你倉五年，偶然去「欣賞」一下，但「文物」原封不動，這樣便用了三十萬，為了什麼？不明白！

近年，朋友手上拿着個iPhone，但卻從來沒有用WhatsApp回覆我們，我覺得奇怪，問他︰「你有iPhone，點解唔用WhatsApp text俾我哋，回覆是否出席聚會？」

「唔使咯，我知道算咯！」朋友答。

「個機你自己買？」

「唔係，個仔買咗部新機，俾咗呢部舊機我！」

奇怪在，他不識得用手機，為何不問人？想深一層，原來他不肯拋掉「舊文物」與不肯請教人都與面子有關。朋友原本是學校高層，退休後身份全無，唯一「安慰」的是過去的文物，所以不惜用每年六萬元來買回這”faded glory”，既然自己仍有身份，所以不會胡亂請教人怎樣text一個信息。他的行為，大致可以用「退休後遺症」解釋。人的行為，真的是「估佢唔到」！