每個晚上，在將軍澳海傍單車徑，一班穿戴專業的公路單車車手都會操圈訓練，從新建的跨灣大橋踩至舊單車天橋，像呼嘯而過的陣陣狂風。有時，在狂風背後，緊隨其後的，是一個身穿衛衣的瘦削少年，踩着一輛二十吋轆的子彈仔緊貼追上。裝上鳳尾的車尾配飾下，掛着一串隨風亂擺的御守，吊着的兩個大鈴噹「噹噹」作響。追上一圈後，他脫掉上衣，癱倒在地。公路車車手不禁說：「我咁大個轆，都俾你扯到盡。」
在將軍澳街車界裏，少年是個傳說。
「佢踩得快過road bike ！」
「聽講佢哋兩個（指源仔及其朋友Kai晉）仲快過架796X巴士！」
「佢真係喪嘅！即係我哋片彎係收腳咁樣片，佢係踩住咁去㗎！佢係我哋將軍澳嘅大佬！」
這少年叫源仔，十九歲，踩街車踩四年了。口頭禪是，「行轉啊，同我行轉咪知你實力囉。」
踩街車，在街頭上混久了，源仔開朗健談，有種跟誰也能打開話匣子的street smart。即便如此，跟他轉述上述讚美，他還是耳根通紅，不好意思地說：「吹大咗，吹大咗。」
本以為散發中產味的公路單車與地痞街頭的街車水火不容。在橫跨將軍澳與康城的舊單車天橋上，卻活像一個單車聯合國，幾乎晚晚也出來踩車的源仔就是穿越國界的親善大使，不但跟公路單車車手有講有笑，連踩風火輪的居民也可寒喧幾句。
砌一部追上公路車的子彈
源仔小時患有哮喘，很少運動。長大後，體格強壯了，他便報復式運動—但玩的卻是跟別人不一樣的玩意：滑板、劍球、扯鈴（中國傳統雜耍一種）；約四年前，他開始踩街車。源仔，以及許多街車車友，迷上子彈，皆因其組裝的靈活及無限可能。源仔起初在二手市場買下黑馬車架，兩年多期間，換過多個零件如變速、手把，最終砌出現在模樣：座位極高、車頭位置極矮；不必要零件統統捨棄、以換取乾脆俐落的車身，「架車係用嚟飛嘅，玩直路嘅。」他說。許多街車愛好者愛駕車飛山，認為「玩飛山子彈仔先係王道」，「我唔想玩啲咁大路嘅嘢，我比較少少係向難度挑戰」。於是，他把子彈仔砌成一架在平路飛馳的機器，即便許多人覺得「平路點夠公路車快呀」，他還是以自己及愛驅証明了這部車的確可追趕上公路車速度。「我部車最快行到五十五公里時速。」他說。
街車除了用來「鬥」，當然也用來玩。源仔就如大部分十幾歲的街車仔，喜歡一班朋友結伴躝街。他展示電話上的影片，裏面全是朋友們四處百厭，胡鬧搗亂的畫面——有人曾邊踩車邊吃叮叮意粉、有人雙手雙腳全凌空，平躺在滑行的單車上……一班好兄弟，親密得連對方父母也相熟，常常入屋吃飯吹水。「其實我以前係邊緣人，喺學校冇乜朋友。」源仔說。他剛開始踩街車時，將軍澳較年長的一班子彈仔車手差不多都淡出，他便成為「斷層」後第一個出現在將軍澳街頭的街車仔。踩着踩着，閒時又跟人鬥車，不鬥不相識，就這樣一、兩個結識起來，朋友又帶上自己的朋友，「就無啦啦多咗十幾個人一齊出嚟玩。」
源仔笑說，以前大家年少，沒有自己電話，但總是互有默契地在單車徑碰面，見到就大喊：「喂又係你啊……」。儘管他在聽到記者問「識咗咁多朋友，但都係冇識到女朋友？」後嗚呼慘叫兩聲，他仍說，「街車帶俾我最大嘅嘢，都係呢班朋友。」
用生命踩車 試驗街車極限
最近，他跟幾個同樣踩得飛快的朋友自組車隊，取名「神風」。他們更自家設計印上「神風」兩字的貼紙，貼在鳳尾上。隊名靈感來自日本二戰時的神風特攻隊，「你踩得呢部嘢，你咁樣踩法嘅時候，你係等於差唔多攞條命出嚟踩啦。」有次，他又跟公路車車隊鬥車，他以四十幾公里時速落斜時失控撞車，結果腳趾骨折，休息了近兩個月才可重新踩車；又一次，他炒車後，後面的公路單車收掣不及，直接輾過其身體，「我背脊損曬，又因為個傷口係咁出水，我完全瞓唔到覺。」那次受傷後，源仔也曾一度想放棄踩車，更曾想過賣掉愛車。但身邊朋友說，「源仔，唔好玩啦，你部車邊有人敢收呀？」因這位車主速度之快、聲名之響，購入的新車主難免感到壓力，「好多人都話carry唔起，唔收。」就這樣，跌跌碰碰間，傷口潰爛又結疤，源仔又回到將軍澳海傍，成為在行人身旁掠過的一陣強風。
用生命來踩車，除了為追求一下刺激快感，於源仔而言，也在於摸索其單車性能的極限。「你要明白，架車可能爭少少嘢，個brake校應少少，或者條胎個胎壓冇咁高，會發生啲咩情況，呢樣嘢都係你自己靠經驗攞返嚟嘅。」街車愛好者，不乏換車如換衫之人，但源仔卻堅持摸熟一部由自己一手一腳組裝及試驗的單車，「比如話，我明白呢隻彎我可以再進取啲嘅入去，我可以做到呢樣嘢。我唔知自己架車極限去到邊，咁我點同人哋玩？」
源仔跟朋友們，說他們這班人「咩人都有」，也有大學生。源仔問，「啊邊個邊個唔係讀咩中大泛dip咩？」朋友豪仔說：「係high dip，唔係泛dip。如果佢咁都算係中大學生，咁我都係……」源仔讀到中三後，決定投入社會打工，現在工作是貨車跟車，早前亦考得船牌，亦將準備考取小型貨車執照。在部分家人眼中，他或是讀書不成、沉迷街車的𡃁仔，更曾以難聽的說話如「MK仔」等罵他，他卻一早看得通透：「咁就由得佢哋講，把口都喺人哋度，人哋點講我都冇計。我覺得都係做好自己，我做到有成績，我唔係只係識得玩，我考到牌，我自己搵到食，又唔使伸大手板問屋企人攞錢。」他對自己的中三學歷不以為然，「我嘅睇法係咁囉，我贏人唔係贏學歷囉，係贏經驗。」
承傳街車 照顧更年輕一代
長輩或認為子彈仔是荼毒年輕人的旁門玩意，源仔卻認為街車從未把他帶壞，卻「帶俾我好多好多」，包括踩車以來的種種經歷、所認識的朋友等。街車羣圈子小，基本上人人認識對方，「就算我出屯門嗰邊，唔識路喎，我喺個WhatsApp羣組度問，實會好多人應，甚至話依家過嚟搵你。」
「或者話，係好定壞，唔係街車依樣嘢帶俾你。係睇你自己點揀。」街車的靈魂從來在街頭。而街頭，從來混雜、紛陳，法律秩序的邊界在此分崩離析。源仔以前有些街車朋友，後來走上混黑社會的道路，不再踩街車。前文曾提將軍澳子彈仔一度出現「斷層」，也是這原因所致。「咁講又同你講咗，提又提咗你，咁你自己都要揀呢條路去行嘅話，我都阻止唔到你。」他無奈地說。現在，對着一代又一代投入子彈仔、才十二、三歲的新生代，源仔跟其他大哥哥也不厭其煩地教他們砌車、解難、甚至免費出讓零件；也希望他們藉着踩街車，避免走上歪路。源仔笑說，有時這班小朋友半夜還流連街頭，他們也幫忙勸說孩子回家；有時他們的家長找不着他們，也會打給源仔問自己兒子是否跟他們踩車，知道是的話，也就放心了。
源仔踩車飛快，但到底有多快？少年卻不知道。目前香港單車代表隊，除了玩花式的BMX外，並沒有小輪車的份兒。香港最大型的單車比賽新鴻基地產香港單車節，也只接受車輪直徑至少二十六吋的單車參賽。源仔也有過成為全職單車運動員的夢想，幽幽地說，「都想啊，知道個排名都好。」
以踩子彈仔為職業的夢想尚未實現，也未知何時實現——當下的源仔，依然是將軍澳的極速傳說。
