根據《十八樓C座》的劇情設定，原來周老闆是個六十歲的肥叔叔，三姑一直都是六十多歲，祥嫂是位中年婦人……回到現實世界，飾演這些角色的前輩們其實年事已高，「超齡」了。
陳聰解釋，就像自己飾演的輝仔幾十年都未畢業，的士高的女兒永遠仍在讀幼稚園等等，在《十八樓C座》裏的平行時空是正常的。馮志豐形容他們把人物設定「多啦A夢化」：「呢個係一個俾我哋遊走嘅空間，如果輝仔畢業之後個人一定會成熟咗，咁俾佢保留返永遠嘅天真，我諗對成個故仔都係開心。」
在《十八樓C座》時空裏永遠不會老的周老闆，現實已九十高齡，但依然比同齡人壯健。在今年商台六十四周年台慶，大會特地加設向金剛叔賀壽的環節。陳聰被金剛在台上支持時的一句話深深觸動：「佢話，佢會繼續努力。一個九十歲嘅人同你講佢仲會繼續努力喎，我哋後輩情何以堪？」
金剛叔在訪問裏多次強調自己一直不退休是為了「搵兩餐」。當他回顧昔日廣播業的輝煌史，講述飾演不同角色的入戲技巧時，雙眼炯炯有神，說得眉飛色舞。其實他對自己的工作有滿滿的感情，亦很在乎自己在錄音時的表現。
「我希望做到瓜老襯嗰日為止。」金剛叔真的沒想過退休，至少，他沒有想過主動遞信走人，實行順其自然，做得幾耐得幾耐。
周老闆不會老，亦不會死，但回到現實世界，生命始終有限期。金剛叔毫不忌諱談生死；我問他，倘若他日周老闆這個靈魂人物因為你的離去消失，可有想過劇情會如何發展？
「唓，冇咗周老闆有另外一個啫。」他笑了兩聲，續補充從不覺得自己是《十八樓》裏的靈魂人物：「講兩句都係靈魂，冇咗嗰兩句你都埋唔到欄（劇情做不下去）。我唔覺得自己係好突出，不過事實我用咗心血去做呢個角色，完成自己嘅任務。」他又說，像周老闆這樣的平凡人角色，其實存在於四周，「個個都可以係周老闆。」
類似問題原來不斷在馮志豐和陳聰腦裏預演，但他們坦言，至今仍未有很踏實的答案。
「係咪唔變得？其實唔係嘅，因為一開始周老闆並唔係主角，係慢慢變成主角，係一個歷程，但嗰個歷程以十年計。」陳聰接着補充：「難保拉表叔他日喺法國返嚟呢？」
馮志豐認為，「周記」的傳奇是演員、編劇的共同創作，「如果周老闆冇咗啲過癮嘅茶客，其實佢一個人都做唔到嗰種感覺出嚟。都係嗰句，珍惜我哋每一天啦，我感恩㗎，每一天仍然能夠聽到。」陳聰也回道：「未來是未知數，多一日就多一日。」
或許，「周記」會在未來某一天熄燈落閘，茶客各散東西；又或許，周記會在未來某一天頂手他人，經歷一翻大裝修，迎來新的員工加入、新的茶客光顧，然而，那杯香濃醇滑的金牌咖啡，依舊在「周記」供應，而我和一眾「周記」熟客仍會掛念着那一句中氣十足的：「黐筋啦！」
