黃樹棠今年七十四歲，精神奕奕一啲都唔似長者，行得走得仲好打得，香港、大陸、澳門都有人搵佢拍戲，去年底黃樹棠發現患了大腸癌，醫生幫佢分段切走十厘米有癌細胞的腸，「我冇事啦！做完手術第二日即刻去元朗開工，因為當時拍緊網劇《反黑》，導演好好安排我拍行行企企的文戲，唔使我咁辛苦，之後自己做番游水、行路的運動，將個身體慢慢搞番好，依家已經冇事啦！」
黃樹棠搞番好個身體，行得走得俾人話佢經常去深圳「搵女」，有不同的囡囡陪玩、陪食，棠叔由得人講都費事澄清，「你知啦！娛樂圈任何事都有人講，澄清都冇用，你依家問起我先講，內地妹妹仔全部是『殭迷』，冇老公都有男朋友，大家一齊影張相就俾人唱陪玩陪食，搞到我幾唔好意思，叫佢地同男朋友解釋下。」
黃樹棠話大陸好多觀眾睇完《我和殭屍有個約會》好鍾意，自發成立一個「殭迷會」，全國各地加埋的粉絲超過十萬人，「我經常同佢哋聯絡，好似陳啟泰去大陸出席活動，我就通知個邊嘅負責人，佢哋組隊拉晒橫額去捧場，一來見到偶像好開心，二來都可以打氣助陣，大家都開心，舊年我做舞台劇，佢地都好有心整紀念品送俾我。」
黃樹棠話自己咁多年都冇搞搞震，冇理由臨老入花叢，因為負責「殭迷會」的聯絡，各省「殭迷」聯絡人都是係佢老友，大家組隊到香港旅行，佢有時間都會帶大家遊香港，去到全國各地，大家禮尚往來又會招呼佢，大家有來有往好老友，棠叔話：「所以我點會退休呢！之前做完手術話俾自己聽永不言休，所以好勤力運動，又戒口一日食十餐，等自己盡快恢復狀態。」