望向電視機，唔覺意都會睇到啲電視節目，而家流行美食研究，好多關於飲食用詞都會翩然入耳。好似雞有雞味、鴨有鴨味、豬有豬味、牛有牛味、羊有羊味等等，一聽到自然會吞口水，上述味道已湧上舌頭，都係一種享受。本來雞有雞味只係好正常嘅現象，但今日社會已經成為苛求了，雞冇雞味、魚冇魚味、肉冇肉味冇代表乜嘢，唯一好味嘅嘢只有味精，冇味精就冇咗師傅，冇咗師傅做鬼都唔靈。
近年興起車呔評價，滿天星飛來飛去，連屋企附近街頭巷尾的食肆都星星聲，點樣好食法真係唔多覺，好似有間麵舖响度食咗幾十年，都係為咗方便唔使行咁遠先入去食，咁又推介一番嘞。今時今日嘅雲吞麵、魚蛋粉就算榮登車呔榜，都係不過如是矣，再也食不到以前嘅感覺。其實又唔係時代倒退，係政府為保障市民健康，食物禁用水楊酸，唔可以落水楊酸嘅魚蛋同生麵，彈牙極都有限矣。為咗討好食家，以前做飲食嘅都會各出其謀，舊時居處，台口是大牌檔，上午賣腸粉白粥油炸鬼，佢哋賣嘅油炸鬼鬼咁好食，新鮮炸起又香又脆，如果時間啱，我哋一定幫襯。後來仲做埋親戚，再後來，政府消滅大牌檔，檔主被迫退休唔做了。當然，家庭聚會時有見面，講起而家再食唔番你哋以前大牌檔嘅油炸鬼。點知對方話：「唔食冇壞嘅。」佢話而家講出嚟冇所謂啦，啲油炸鬼係加咗料嘅。哦，加乜料呀，佢話：要加洗衣粉，加洗衣粉落去搓嘅粉，炸出嚟先至脆嘅。