鄧達智與陳梓欣五星期的蜜月旅行有歎世界的意大利酒莊、溫泉、沙灘加Shopping，也有冰島遠足和浸溫泉，說到最難忘最驚險的，一定是挪威沿海峽灣行山。
當鄧達智Post了剛剛到此一遊的空中懸石Kjeragbolten相片在社交網站後，朋友紛紛留言「為何玩得咁大？」、「嚇到腳軟」、「唔好玩咁大」，其實鄧達智早前剛抵達魔鬼舌頭Trolltunga時，已經覺得好攞命。「魔鬼舌頭來回廿多公里，清晨六點上山，行十一個鐘，不斷上山落山，溫度只得零至十度，大多數只得五度，凍到死，下山對腳唔似屬於自己。」點知攞命無極限，二人繼續挑戰底線，來回徒步走十公里，爬過三個山頭，當中有傾斜程度接近一百八十度的斜坡，需要用鐵鏈拉自己上去，沿途冰河積雪，非常跣腳，辛辛苦苦來到空中懸石Kjeragbolten，鄧達智以「簡直世上無雙的終極」來形容。「我畏高，真的是我的終極挑戰，Clement（陳梓欣）斯斯文文，反而膽正命平，大膽到呢。」問二人來到這個「空中波」，有否互相交帶「遺言」才繼續上路？鄧達智說：「沒有，Clement話點會去唔到？點會有事？他仲想來一張心心相印照片，我打死都唔肯！佢就浪漫囉！下面係一千二百米直落海的懸崖，肯定冇下一次。」據鄧達智形容，這個空中懸石表面如一張六人枱那麼大，表面圓卻不平坦，由山邊步行到空中懸石的位置很狹窄，而且沒有欄桿和鐵鏈，所以他最終沒有企到懸石中間拍照，只由陳梓欣幫他補張「坡」旁英姿勃勃相片，「人度甜咪咪蜜月，我哋度艱辛驚嚇蜜月！其實爬完山後，我手腳都俾岩石刮損了，用冰川的雪來止痛消毒。」反而陳梓欣有股大無畏精神，在空中懸石上又企又坐，還協助和鼓勵來自俄羅斯的孕婦站在石上拍照，拍下懷孕五個月的靚靚大肚相。
