無綫花旦朱晨麗（朱朱）近日忙於拍攝《法證先鋒IV》，雖然該劇尚未殺青，朱朱已投入拍攝另一劇集《大醬園》，工作一浪接一浪。朱朱表示於拍攝期間手肘劇痛，原來當時手肘已甩骹，為了趕上進度，朱朱忍痛參與一場天台救人戲。在拍攝飛身救人時，不幸傷上加傷，撞瘀小腿上五吋下五吋的位置。
朱朱期後請醫師檢查時，發現原來她的頸椎嚴重移位：「醫師問我係咪撞過車，我話冇，醫師好奇怪話冇撞車，點可以歪成咁？醫師好好幫我針炙又啪骨復位。」她透露手肘甩骹是舊患，「加埋之前有啲動作場面，所以傷上加傷。我只係睇到一次醫生，覆診都冇時間，依家患處仲隱隱作痛！因為依家忙緊拍《大醬園》，希望呢一、兩日可以再抽到覆診啦。」
談到天台救人戲，朱朱說要克服心理障礙，站於39層樓之高撲救企跳女子， 一向畏高的朱朱今次作自我挑戰，在鏡頭前型到爆，朱朱心有餘悸地說：「其實真係好驚㗎！冇遮冇擋企到咁高，風力又大，仲要喺圍欄邊衝過去救人，雖然有威吔，真係都腳軟，係咁叫自己唔好向下望，唔好四圍望，集中精神救人，不斷叫自己克服，好彩只係NG幾次就搞掂，我都幾滿意呢場戲。」
朱朱笑言自己已練成「金剛身」：「呢套劇經常連踩十幾、二十個鐘，好多日只係瞓幾個鐘，或者只夠時間返屋企沖個涼，休息一陣又要繼續。」問到如何忍受：「 靠意志囉，不過能夠拍部好劇，辛苦啲都值得嘅。」
