早前宣布懷孕的梁靖琪（Toby）與老公施雋賢（Jon）、好姊妹鍾麗淇（Margaret）受邀出席慈善晚宴，為國際慈善團體 AIM（Agape International Missions）籌款，拯救一班柬埔寨雛妓。
Toby身穿紅色晚裝以及三吋高踭鞋到場，而老公Jon與Margaret就化身「左右護法」傍實。Toby笑言：「我老公非常煩，由我開始話要着高踭鞋之後，佢就上網係咁睇孕婦幾時唔着得高踭鞋，係咁叫我買過對鞋，所以今晚我行去邊，佢應該會跟我去邊。」
懷孕3月的Toby表示現時健康狀態十分好，故身體力行支持慈善，「依家習慣每個星期會同老公去教會，每晚都會祈禱，希望BB聽多啲我哋講嘢，帶佢做多啲慈善工作。今年因為要留喺香港安胎去唔到柬埔寨再做探訪，不過已報咗名下年再去，唔知到時會唔會帶埋小朋友去做義工呢？」
至於Margaret則笑稱客串做Toby的「一晚助手」：「有得做慈善，食飯之餘，又可以做Toby助手，托一托佢隻手，等佢行得輕鬆啲。我同佢講湊仔永遠都係一個謎，每個小朋友都唔同，不過Toby好多湊仔經驗，我兩個女係佢契女，湯盈盈嗰兩個都係佢契女，加上有咁多朋友係身邊照顧佢，應該冇問題啦！」