林海峰（Jan）一連七場在紅館舉行的《是但噏Happy Monday》楝篤笑，今晚是最後一埸，舞台以辦公室環境做設計，Jan除了大談打工仔心聲，緊貼時事的他亦以這幾個月香港發生的事做話題；「以前就話『工作係恩賜、休息係放肆』，但今日變成『加班係恩賜、加薪係放肆』」、「以前權力愈大責任愈大，現在係權力愈大隻鑊愈大」、「只係容許下面的人忍夠辭職，從來無上面的人引咎辭職。」
林海峰和太太彭羚育有兩名女兒林泳和林清，Jan無懼媽咪、太太彭羚和女兒在台下，在台上以日常點滴披露為人子女、人夫和人父的辛酸。
「我屋企都有兩個公主，一個19歲、一個15歲，19歲嗰個著啲裙又薄又輕又短、好似幾歲大著嗰啲咁細條，睇到我心都跳埋出來。」、「我細個好百厭，有次同細佬打交，阿媽兩個都打，打到藤條都爛，唔知我還是細佬話要登報脫離母子關係，阿媽就一路話『你試吓吖』！一路去煮飯。但如果現在登報，我就會話『本人林海峰及細佬曉峰，感謝我阿媽以公平、公正、公開的方式處理我倆兄弟，絕無大細超，不孝子上！」
整晚Jan更十八段武藝盡出，一人分飾多角似的，繼扮上司、下屬、男女聲音外，更扮打乒乓球聲、滴水聲、甚至唱出日本商店歌；跳舞時又扭腰擰籮，雖然在表演期間，Jan不慎甩了多次嘴要重講，但無損觀眾的投入，依然笑聲不絕。
Encore部分，兩位表演嘉賓黃秋生及葛民輝分別扮演黃經理及葛主任先後登場，二人 以搞鬼搞馬的「西裝服」鬥獻技，阿葛彈Ukulele，秋生則吹口琴，更搞笑是講廣東話時扮不純正，多次爆出粗口諧音。
二人又與Jan暢談打工仔心聲，齊齊又講又唱又跳的合唱多首歌曲，最後合唱陳百強的《疾風》為整個演出劃上句號。
