【阮兆祥演唱會】祥仔豪花7位數圓歌手夢

一連三場的《阮兆祥King of Dreams》演唱會已於昨晚（10月27日）圓滿落幕，雖然昨日旺角一帶出現了封路情況，但仍無法動搖祥仔粉絲們到場的堅持，正式開場後的入座率達八成。

昨日場館附近出現封路情況，但佘詩曼、周家蔚、上山詩鈉、林盛斌、白健恩、李漫芬與丈夫、錢國偉等亦先後到場撐祥仔。

相隔六年後再開個人演唱會的阮兆祥，是次演唱會簡直花盡心思，據知單單是製作費已直達七位數字，祥仔笑言：「今次三場騷花咗7位數，我將個舞台加高同加長咗，又有機關（Track台、旋轉舞台、升降台）同燈光設計，平時呢個場用120盞燈，今次用咗190盞燈，完全係超哂預算，因為我想做個有水準嘅演唱會，作為我回歸樂壇嘅禮物。」

用190盞燈做麥花臣嘅舞台效果比較少見，但相信祥仔見到全場粉絲舉起手機燈會覺得更感動。

今次演唱會咁揼本，大家都好關心祥仔可以有幾錢落袋，祥仔就話：「我未計數，要問（梅）小惠，我就成日想使錢，佢就叫我慳啲。」與小惠份屬多年好友的祥仔，大讚小惠工作認真又投入，無論凌晨或是晨早都是「工作中」 ，並笑言自己欠對方一世。

祥仔又指自己最後一場表現被盛讚超越滿分：「第一場好緊張，好似我嘅初生BB咁，第二場有90分，監製話今晚畀足120分，見到觀眾好投入，十分感謝。」對於昨晚旺角情況，祥仔受訪時一再強調十分關注到場觀眾安全，更數度與場館作出相應緊急措施及安排，務求彈性處理觀眾安全問題，並謂十分感謝仍有八成觀眾不辭勞苦前往支持他：「今晚係賣晒啲飛，我真係好感動，因為觀眾肯買飛對我嚟講已經係好好嘅鼓勵，但仍希望大家安全至上。」

祥仔在尾場ENCORE環節即興賣大包走落台與現場觀眾握手作近距離接觸，全場尖叫聲即時不絕於耳。