張建聲 (Justin) 近日拍攝由歐錦棠監製及主演之ViuTV《打天下》，劇集以空手道為主題，當中有多個武打鏡頭。昨日 (20日) Justin親身上陣時，卻不幸發生意外，他被武師凌空飛腳踢中頭部，當場流鼻血兼爆唇，臉部紅腫一片。
受傷後的Justin即感到頭暈暈，但他仍堅持繼續拍攝，專業表現獲在場人員大讚，而歐錦棠亦有上前慰問。
事後Justin表示：「《打天下》有好多鏡頭我都選擇親身上陣，現場有動作武師喺度，動作場面設計得靚就難免危險性高，結果我呢次好唔小心地中咗武師哥哥一腳，食到正晒，即場暈咁滯，跟住自己就即刻check吓有冇崩牙，因為上次拍《作家的謊言：筆忠誘罪》已經撞崩牙一次，今次好彩冇，但口腔損晒，因為啲牙撞落個嘴度，又流鼻血，鼻骨有啲痛，最緊要唔好撞歪就ok。」
去年Justin拍電影《作家》時，不慎撞爆半隻門牙，他索性將這一幕意外放進戲中。
今次他拍《打天下》受傷，再次將片段加置劇中，「最好彩係用得到，連抹乾鼻血再流都係真。我覺得呢次算不幸中之大幸，因為大家都搏晒命拍，武師哥哥就唔好意思，但唔緊要，最緊要效果好。除咗《真・三國無雙》外，今次係我從影以嚟打得最勁嘅一次，但打空手道係好體力化同埋身肉搏，劇組都估唔到我會做到呢啲打嘅動作。」