升中統一派位期近，有家長趕來問我統一派位甲、乙部選校有什麼值得留意的地方，以下為家長與本人的對話，有興趣知道中一統一派位填表要訣的家長，宜細心閱讀。
趙為本人 家為家長
家：趙Sir，中學和小學的統一派位有什麼地方不同？
趙：問得好，中學和小學統一派位，程序差不多一樣，只有一點不同，而這一點便將整個派位策略改變了！這一點便是小學的統一派位，是甲、乙部全都用「大抽獎」（即隨機編號）派位的，但中學，卻是先用Banding派位，不足夠學位，才用大抽獎來決定。
家：先用Banding派位怎樣將整個派位策略改變？我個仔Band 2尾又點算？
趙：用大抽獎派位，家長可以將最、最、最心儀小學填入甲、乙部第一位，但用Banding派位，如果家長亂填一通，一定「全軍盡墨」。如果你個仔升中呈分成績是Band 2尾，你不顧一切，把Band 1頭的學校填上甲、乙部，我擔保你會一定「一敗塗地」，因為「升中指引」話到明係用組別派位，而派位程序，係先派Band 1，之後才派Band 2，Band 3；即係話，如果你個仔成績喺Band 2尾而你填Band 1學校，你個仔百分百會派唔到，因為Band 1學校一早便俾Band 1仔晒！
家：咁，今年甲、乙部，我應該幫個仔點填先至？
趙：要用孫子兵法「知己知彼」先至可以「百戰百勝」，所謂知己是知道個仔Banding，這個不難，你可以問學校老師，如班主任和他熟悉老師，佢經驗老到，自然知道你個仔組別，如果佢話個仔Band 2尾，咁你最好搵一般人認為個Banding中學。
家：自行分配，我今年同佢揀Band 2頭中學，結果失敗，我唔知可唔可以統一派位甲部，揀返兩間中學？
趙：我認為今年填表要保守。因為今年大約有五萬五千名小六生參加派位，比去年多一千四百人，僧多粥少，不宜太「博」，至多甲部揀Band 2中，但乙部就要小心。我提議你第一、 二個位填Band 2尾最好兩間，跟住三、 四、 五就要填Band 2尾排名底三間了！
家：仲有乜要留意？
趙：要參考「中學一覽表」，留意每間學校「非保留學額的數字」，避免揀有「直屬」或「聯繫」小學的中學，因為類學校會俾大部分學位佢小六生，例如喇沙書院同瑪利諾修院學校（中學部），呢兩間「直屬」名校「非保留學額」便只賸下十七個及十一個，反而旅港開平商會中學有八十九個，因冇直屬、聯繫小學也。
家：咁跨區有冇用？
趙：如果由強區如九龍城、沙田轉去弱區深水，南區會有用，但如果由弱區跨去強區就冇用了，因Banding會低！
家：明白，多謝趙Sir咁詳細解釋，令我把握到一些升中統一派位填表要訣。