錄新歌的時候，薛凱琪仍不知道黃偉文（Wyman）已決定將童話系列劃上句號，直到歌曲派台，Wyman才在網上公告，Fiona都是「被通知」的，「拍完MV才見到Wyman在IG寫，一睇到就喊了出來，他之前沒有講，應該是怕影響我錄音，係嘅，人總要move on，要搵獨角獸呵護你，不如真真實實搵個人，我好在乎Wyman這位朋友，十幾年來用童話故事來保護我，知道我鍾意幻想，直到這一天覺得我要長大了，一路追尋唔真實都係痛苦嘅。」
聽Fiona歌曲成長的女孩，都是喜歡沉醉童話世界，「有些fans投訴為什麼現在才出這首歌？豈不是之前浪費了時間？其實這幾年自己都改變，唯一沒有改變是金錢上，一向都不追求，覺得自己可以賺到，只是終日都覺得未夠完美，其實錫你咪得囉，以前要浪漫、要有心跳，其實睇戲先有嘅！現在發覺，人不會對住一個人每一眼都有心跳感覺，可以一生一世，陪你淡然地過，已經夠浪漫啦，我的情緒又大起大落，令到我平衡到，已經是王子，正面些想，南昌街都可以有皇宮有城堡。」
遲到好過冇到，Fiona公主終於開竅，錯過的應該不少吧？「以前會朝思暮想、會暗戀，現在個腦關閉了『童話mode』，focus到現實的男仔，慢慢睇緊觀察中，朋友都話我是一部CCTV，想那麼久個個都走晒啦！的確我對愛情會好驚，好似驚游水會戴水泡，我就要監察住，要睇好耐，有冇錯失過？我覺得是有，用上帝早已預備安慰自己囉，緣份嘛。」對於結婚，Fiona又有不同的睇法，「是一個好糾結的問題，我不相信簽一張紙就有承諾，簽就專一？不簽就可以一腳踏幾船？不是嘛，雖然我不急於結婚，但有另一個問題，就是小朋友，我是想有小朋友的，簽了字的情況下，對小朋友的確是比較公平。
「為小朋友而結婚？可以說是其中一個考慮因素，有做過科技上的research，亦有詢問過醫生，但未實行。」
入行十八年，Fiona從未承認過任何戀情，她對此很驕傲，「我試過好傷心，但又要keep住工作，還要拍喜劇，冇人知就冇人問，我開心唔開心太易睇，突然喊點算？入行咁多年撞過好多板，唯一覺得做得最叻就是把愛情低調處理，娛樂圈好奇怪，無論是愛情、工作和家庭都可以拿出來宣傳，都有價值，我不想愛情成為價值。」
對於愛情，Fiona有另一個渠道抒發，「打造每首歌之前我都會同填詞人傾偈，會說那段時間發生的事，不過，分手傷心過的男仔我是沒有寫過歌，不會紀念他們，只有good的愛情，又或者因為某些原因冇辦法一齊、錯失過的才會紀念。」問Fiona至今最怕唱哪首歌？「《小黑與我》，入行頭一兩年的歌，唱了好多年，直到有一年紅館開騷上台唱，嘩！原來寫緊自己，全部中晒，『陪着我的白貓剛去世』、『父母最後卻分開住』、『謝謝懷疑患過抑鬱症的往事』、『還謝謝暫時遇上幾多角戀的錯事』……不過，聽Fiona的歌長大的女仔都是很堅強，就算慘到《下次下次》都是說下一個會更好！」
髮型：Lorraine @Hair Culture
化妝：Frances Ho @Jessica Chan Team
服裝：Chloe