自從跟孝活朝見口晚見到面，我也被傳染到文雅到痺，內心的世界，按捺不住……呢幾粒鐘，我情願篤爆自己係賣剩蔗，頂爆個肺……有夜機就即刻返香港，就算天濛光倒屎咁早，都要訂定先。鬼知道程咬金奉旨比我個手機快一步，酒店房門一響，順手一開，神風突擊隊之哎吔家姊抱着一樽五顏六色的鬱金香，師弟抱實ＢＢ妺，衝入來有搜查令一樣。我知已輸了一個馬鼻。
「你個仔話啲花呀，係佢老竇送嚟我房，同我道歉喎，呃得過我雙眼，我扐返嚟俾你呀，借花敬佛呀，我向你道歉得唔得吖，你嬲完我未吖？」我尚算沒有亂了陣腳，特登用手指數着她機關槍射出的子彈數目。
「ＢＢ妺，學唔學到阿婆波呀？一口氣講咗成五十幾粒字呀……嘩喇嘩喇，嘩着你個嘩嘩……」人仔開心到照樣學了幾聲。新鮮拿督夫人潘斯里把大花瓶塞在几面，將花粗暴地拉高撳低。
「我哋去騎樓睇泳池吓。」師弟知曉手抱的人肉拆彈機身負重任，不敢離開戰場，ＢＢ妺不停嘰哩嘩喇，有取笑老人家的聲氣，為我爭回幾分。
「家姊，你幾廿年，冇做過梅香女配角，我都冇做過二打六同下靶，但你嫁完一個又一個，啱啱呢個仲預埋自己瓜老襯，條條後路都鋪好晒俾你，等你仲有水位去救世人……我就愈嚟愈等人哋賑災照起我，眼見你冇一個漏咗冇帶挈我哋嘅，我知衰，我乜嘢都冇得報答你，我係嬲我自己……」
「你唔好又搞喊我吓……呢個妝，頭先先至化過晒……我個仔阿蓋大班，你夠救過佢兩鋪，還錢你都唔肯要，條數點計呀，你冇救過我兩仔乸咩？我兩個冇咗，你又點會執身彩有今日呢？」我更自慚形穢，更樣衰，更……行前一步攬緊她，盡在不言中。「唔好攬咁實呀，錫吓我額頭算啦。」我似打司噎般最後一波湧上心頭。
「我係剩番一件事我頂唔順嘅，點解你幫手搞過晒ＢＢ妺啲出世紙手續，但佢阿嫲，唔係，係佢外婆，阿Maria，一直都冇問聲我，出世紙阿ＢＢ妺要改個新名之類喎，當我係搭同一班機，當我傻嘅咁喎……哼……」
「我哼番你至啱呀，你同你個宋小姐冇任何關係噃，好彩我個Honey死早一步，你哋先至可以拖得一時得一時，唔使俾我大石壓死蟹逼婚喎，你仲惡人先告狀？」
「咁張新出世紙叫乜嘢名呀？」
「唏，第時入幼兒班又去改過囉，而家佢反正又冇阿爸阿媽，就跟返個監護人佢外婆，姓宋囉。」
「我問個名呀，咁個名呢？」
「你哋叫開佢ＢＢ嘛，咪寫住Ｂ，E，E，姓宋名Bee，蜜蜂仔幾得意呀。哎吔，你個Maria話英文名叫Beatrice都ＢＢ聲，意思係好開朗，莎士比亞啲劇都有，幾夠掟。我話咁繑口，個細佬哥叫自己個名都一口泡，俾啲同學笑到佢面黃……」這時師弟開門給按門鈴的孝活，我不給同犯有任何心理準備，劈口就問：「你有冇份同ＢＢ改名㗎？」
「吓？唔知你問乜嘢……Auntie呀，一陣追思會大家都要換返晒黑色衫㗎呵，老竇你仲未換？」走得快，好世界，孝活拔足逃出戰場。