近期香港電影業受到疫情影響，鮮有本地電影上映，直到臨近賀歲檔期，導演劉翁以黑色幽默鬼片《糖街製片廠》打頭炮，為新春電影做宣傳。而一直耐人尋味的電影海報終於曝光，導演選中戲中的兩位演員楊柳青、岑珈其的「鬼樣」現身，希望嚇到觀眾笑中有淚。
導演劉翁表示，無懼賀歲檔上映「鬼片」，全因電影笑料十足，加上眾好友力撐，相信觀眾睇得過癮：「呢部戲可以話係笑片，我地喜劇演員有葛民輝、鄒凱光、亞Bob等等，佢地一出場都充滿喜感。其實香港以前好多呢類型嘅電影，好似《猛鬼差館》、《猛鬼學堂》之類，好睇、好驚又好笑，只不過近年少咗好多，對上一套可能已經係《回魂夜》，其實香港人好鍾意睇呢類題材嘅電影，呢啲先係香港本土情懷。」
戲中飾演女鬼的楊柳青，劇組邀請荷里活級數的特技化妝師上妝，每次都需要數小時準備，「其實我都不停嚇到工作人員，有時在片場角落休息時，就會聽到粗口，原來佢地突然見到我嚇咗一跳，要爆粗壓驚！咁我就知道呢個妝好成功，觀眾會睇得好過癮。」
同樣飾演「鬼」的岑珈其就話上妝後不敢照鏡，怕被造型嚇親，「好在都冇咩古靈精怪野發生，大家都會拜神嘅！上妝之後我會好唔方便，大家都會照顧我，餵我飲水、食嘢咁！其實呢個角色係悲劇人物，對我嚟講係一個挑戰，加上第一次試特技化妝，所以拍得好興奮。」
海報造型驚嚇
