未來老婆甚少與我同牀，怕我臨瞓懶得刷牙，還是其次。而且怕我有時發開口夢有半小時的紀錄，有時又瞓過七八個鐘頭都沒有呼吸的氣息，況且她慣於與ＢＢ同睡，還比ＢＢ更早見周公。今晚匆匆完事，滯留在我牀上。
「我好驚阿ＢＢ過慣咗見一日過一日，未入幼兒班，就變咗個卡通人物咁……」
「我哋幾十歲人，就唔會咩？返唔到轉頭㗎啦……」
「我驚我養得大佢，但佢唔似以前住喺屯門嗰個咁抵錫嘅ＢＢ。」
「咁你會唔會搵一晚漏夜同佢偷走吖？但要著多啲衫，帶多啲乾糧同cash，唔好賴低佢隻熊仔，唔係佢就撇甩你，自己走返轉頭，唔好俾佢搞醒我同我講拜拜……」
「你唔好搞喊我……你睇吓，佢似你，瞓着都仲吟吟沉沉，學佢今晚表演隻歌啲狗仔叫呀。」
「今晚咩？」
「呢位先生，而家半夜兩點啦，今晚就戲肉啦。」
「家姊真係好錫阿汽水蓋，情願成晚唔瞓，都去特務基地嗰邊傾天光。
「我幫手同你哋嘅蓋大班落足嘴頭，叫佢唔好走。」
「佢乜人嘅說話都唔會聽。」
「你又話，你講乜佢都聽？」
「我就係叫佢乜人嘅說話都唔好聽。」
「哼……你記住今晚做司儀唔好輕佻到過晒龍呀，你扮鎮定個樣過晒火㗎。」
「我叫阿Howard班定多枝冇彈左輪我壯吓膽。」
「真槍俾你？錯手大義滅親，我哋個個就死得冤枉。」
「咪郁！」
「放手呀，瞓啦！」
「唔係呀，ＢＢ落咗牀仲跳舞呀，……係咪夢遊呀，你快啲去捉實佢喇……」
孝活與棚尾拉有無與日俱增，我也無心情去八卦，兩人身兼數職，分別掛名這慈善籌款騷的機構話事人，今晚還要暗防蓋大班的對頭耳目混入現場，輕的博亂劫走目標，重手就頂多你死我亡。故此乖仔金睛火眼各種防不勝防的關卡，太子女亦有見慣蛇蟲鼠蟻的大將之風，早已攏絡好警界，以確保全場顯貴及善款，實則加碼抗敵。但又不能讓危機掃興，流失今晚畢竟是幾重意義。哎吔家姊未登台前逐一迎賓，保持風華絕代，但一雙徹夜無眠的加大碼眼袋未能減退。幸好攝影機蜂擁去包圍的一男二女，比眾紅星富太更搶鏡，孝活架起今晚贊助本季的踢死兔，左擁右抱，故意為ＢＢ打氣的瑪莉亞宋，由頭到腳都是柯德莉夏萍的翻版，另一邊的太子女彭美拉更徹底露背，兩位插實我乖仔的手臂，三人四足，令我唯有羨慕而不忍心妒忌。序幕由ＢＢ身穿品牌為她設計的乾濕褸，領着全部不同款式乾濕褸人馬繞場一周，全場鼓掌受落，無人猜度事有景轟。我在後台步出前，家姊由後面塞一封利市落我衫袋，繼而又同樣動作在後面幾個一模一樣的助手身上，就去幕後擺好一個姿勢。到聚焦燈光射我就位，我的惡習又來，向下面席間幾位豪門艷婦單眼，但無損掌聲加碼，幕未開家姊的歌喉已展開，喝采及口哨即起，我突然發覺，那不是做媒帶頭的師弟，這位主角見慣世面，毫不閃縮，開腔的娘親，第一句既興奮又激動，掃射到眾多的乾濕褸的人羣中，她也還以一個飛吻過去。