在這間酒店住落幾個月，已當正是屋企，發生了罪案之後，一家五口已搬上頂樓東翼，霸了四間套房，彭美拉報效幾個公司下屬，保鑣巡查，輪更伺候，以防汽水蓋的仇家未在吉隆坡撤退，密謀再來一鋪六國大封相報復。師弟與蓋大班索性回歸這個架步，以黃天蕩黃地搖雙虎將出入無常，擾亂視線。幾個房間亦有穿梭直通的門口，春光無限好的畫面亦不欠奉。
今晚ＢＢ周遊列房，已完成孝活教她簡單十句英語會話的考試，重新回到我和瑪莉亞在抽看電視外語片頻道的房間，這套叫《ROOM》（《抖室》），我未來老婆已看過三次，次次都淚流滿面，皆因令她想起兩婆孫在屯門望天打卦的日子，ＢＢ也順應舉高一條豆丁的手巾仔給她抹眼淚。最後一場做到五歲的哥哥仔與媽咪重訪被困五年的斗室，童星煞食的演技，向枱椅、水槽、盆栽、天窗……一一說再見，瑪莉亞都會喊到出聲，今次最例外的是ＢＢ爬上牀來，「幾時……返去呀？」
「返去邊度呀？」
「仲有邊度唧？佢梗係講返去香港，屯門你嗰度，我青山嗰度，ＢＢ呵？係咪呀？」人仔眼仔更瞪大的點點頭，「我冇同……姐姐……拜拜呀……」
「邊個姐姐呀？」
「嗰個我返咗工，託佢湊阿ＢＢ個芳姐。」
「我都冇……同哈囉激池拜拜。」
「你咁多HELLO KITTY喎。」
「唔係呀，你家姊買俾佢，仲高過ＢＢ幾個頭嗰隻呀，點帶埋佢過嚟唧……」
「佢好……㗎……住我哋……」
「你係咪都好掛住佢吖？」ＢＢ也眼濕濕的點點頭，兩母女攬埋一嚿。「聽日唔好再睇呢套戲啦，唔准呀，睇肥狗仔嗰套喇……」我點會唔明白，會行路先啲人仔，注定是辛苦命。
七十二小時前，抹不走的那個半夜，是生離死別的預演，日日你眼望我眼，有得震冇得瞓，發夢也估不到，ＢＢ和我，這個Uncle PK，一分鐘之內，雙方都變做彼此的救命恩人。未來老婆借那套戲百看不厭，無非正式流大殼眼淚。「Mary姐諗到冇得諗，話不如叫我哋嗱嗱聲結婚，即刻就去英國度蜜月，阿Haward同Pamela做伴郎伴娘，人人有份，個個一齊去，咁阿Pamela又可以大條道理出門，我哋又繼續朝見口晚見面，好過坐喺度等阿蓋大班啲仇人再出現，我哋無覺好瞓……」
「家姊呢種諗到冇得好諗，都好回塘，我就覺得咁揚，係屎橋，成班人操兵咁出動，對方咪仲加一網打盡，而且我哋疏忽咗一樣嘢，點解由頭到尾，冇見過阿太子女嘅老竇老母出現過，發生嗰晚咁大鑊，一直都係佢個女自把自為，孭晒上身，兩老仲繼續人影都冇，我哋呢邊就自說自話，其實阿仔咁醒目，一粒聲都冇出過，俾我好好地瞓醒一覺，我揪住佢，審到佢有嘢講。今晚我哋唔好開工，醒你嗰啲杞子茶過我飲吓。」
「哎吔，ＢＢ又落牀夢遊啦……」
「唔好理佢，我噚晚特登合埋眼當乜都唔知，裝到佢識得射籬眼，睇吓我哋有乜反應。」
「唔信。你寃枉佢，佢真唔識諗埋咁多蠱惑嘢……」大家鬥睇戲做戲不夠三十秒，ＢＢ如有神助，擒上梳化背，借力步步高升，竟然攀到上去裝飾櫃，瑪莉亞已忍不住想飛身落牀，我仍想拆破ＢＢ的苦肉計，就在千鈞一髮，ＢＢ一如在舊屋第一次和我見面，充滿信心的在櫃頂飛落來我迎接她的臂彎，今次不是排練，ＢＢ不顧目標就向前一躍，嚇得我也飛身插水般接力，結果瑪莉亞驚聲震天，似夜半發生命案，我和ＢＢ在地氈上葫蘆打滾，這時她才正式醒來，放聲大哭，看來她這幾天的經歴，不懂用說話表達，我又將她寃枉，兩個就躺在地上喘息。鄰房全體卡士聞聲陸續在房間內通道前來捧場，家姊差點想上前想摑我兩巴：「你幾廿歲人，你有冇癲啲呀？半夜三更搞到阿ＢＢ喊到咁悽涼，ＢＢ跟婆波去我嗰邊瞓，阿Maria，你個未來老公癲得咁勻循，你諗清楚至好嫁佢呀……」