馮盈盈最近參加《好聲好戲》獲網民好評， 令觀眾對她的印象大翻身，下星期四（10日）就27歲生日，今日佢喺Instagram分享同蛋糕合照，表示自己嘅生日願望係鼓勵更多人轉食素，減少食肉，希望用「食」救地球。
馮盈盈今日upload咗唔少精美素食，同大家分享素食嘅種類，其實比想像中豐富，素食都有唔少精緻嘅和式蔬菜料理，連「壽司癮」都可以照顧埋。馮盈盈更話嚟緊會分享更多素食資訊，亦歡迎網民同佢分享其他素食好去處。
畢業於食物及營養學系嘅馮盈盈，對健康飲食好有心得，平時除咗分享飲食哲學，有時仲會拍片教大家整健康食物，例如用茄子整日式蒲燒鰻魚飯、地中海鷹嘴豆沙律等素食菜式。另外，佢話如如果想較容易適應素食，可以先食植物肉，而市面上嘅仿豬肉、仿牛肉，亦可以整到唔同仿肉類嘅素食菜式。
圖片來源︰馮盈盈@Instagram、YouTube
