Serrini（梁嘉茵）聽晚起一連3晚（6月18-20日）係九展Star Hall舉行《I’M (NOT) FINE, THX.》演唱會，3場門票日前已售罄。而為了答謝樂迷多年支持，尾場演唱會更會進行網上直播，等買唔到門票嘅fans都有得睇。
Serrini為咗杜絕黃牛，同主辦單位特別舉辦「樹妮妮DSE能力試」，當中考最高分嘅頭150位「高材生」，可獲得優先訂購門票嘅資格。但係唔少粉絲都撲唔到飛。Serrini同主辦單位商量後，決定係6月20日尾場加開網上直播版，滿足未能入場及身在海外嘅粉絲。Serrini希望網上直播可以令一眾買唔到飛樂迷都可以一齊參加呢個Party，佢仲話希望全世界都可以睇到佢，同全世界分享佢嘅作品。而且尾場當日係父親節，有粉絲可能要照顧屋企人唔可以親身到場，亦可以同家人一齊睇演唱會，「都係一個好好嘅茶餘飯後娛樂。」
點擊睇更多梁總理靚相：
對於演唱會門票有炒賣嘅情況，Serrini講笑話黃牛飛令佢更「自大」，希望能夠係演出、編曲等方面有進步，未來嘅演唱會都可以盡善盡美，報答歌迷支持。
是次網上直播設兩種票價，「獨獨觀賞票」為200港元，「家庭直播票」為580港元，購買直播門票嘅觀眾除咗可以係6月20日當晚觀看尾場直播之外，亦可以係6月21日12:00至6月23日嘅00:00期間無限次重溫。
圖片來源：梁嘉茵@Instagram、KKBOX
