黎明（Leon）於1993年推出的專輯《夏日傾情》，主打歌《夏日傾情》多年後已為經典金曲，Leon已很久沒有聽過，近日卻重新錄製，他說：「因為有機會開演唱會，在彩排時唱或在演唱會唱，因為自己都熟所以冇需要攞返當年嘅CD版嚟聽，但喺舊年有一次坐人哋車，個人突然播出《夏日傾情》當年版，我一聽之下，即刻醒悟，什麼叫做『力拔山兮氣蓋世』，唉，聽返當日自己唱的版本，真係震過貓王，不停震，句句尾個隻字都震，我意思係啲震音～～」
Leon對當年版本無法忍受，更恍然大悟，「鍾意聽呢首歌嘅朋友，我辛苦了你們的支持，真係要講句，對不起我愛你，為咗防止大家唔覺意再聽返當年的震音老土版，我覺得自己馬上需要重新錄製此曲，亦都經過重重困難去申請版權，最終如願重錄，做人畢竟要與時並進，當年情可以存在，但必須面對已經過時，所以重新唱過。」
除了《夏日傾情》，他還將多首金句重錄，其中《越夜越有機》更將編曲中的槍聲刪去，希望帶點和平氣氛，最後又發揮金句王本色，「鍾意定唔鍾意，對得住自己咪鍾意，又冇對唔住人。」今日（06/01），新版本已在音樂平台上架，大家聽咗未？
