黎諾懿日前接受無綫娛樂新聞台節目《星光路上》專訪，自藝訓班畢業不久即在劇集《當四葉草碰上劍尖時》擔任男主角的諾懿，更獲安排與林峯、吳卓羲、馬國明、黃宗澤及陳鍵鋒組成「奧運六星」。由於很快備受重用，諾懿坦言當年變得目中無人：「嗰時以為自己係古天樂，會朝住梁朝偉、劉德華條路行，當時仲細，冇受過咩挫折。」
但在被批是六子之中星光最黯淡一位後，諾懿被調去兒童組，他曾因此大鬧藝員科：「佢哋叫我不如去兒童組訓練吓，之後我直情反枱，我諗住做劉德華㗎嘛，點解要入兒童組？高層話周星馳都做過兒童組，我覺得呢句嘢好銀耳，人哋係未紅時做，但我係調番轉喎，有冇諗我感受？」調去兒童組後，諾懿變成「暴龍」四處發人脾氣，更曾因一件小事爆粗鬧爆工作人員，現在回想都感到相當慚愧，並很想跟對道歉。
改變了諾懿的一生的，正是當年參與節目《舞動奇蹟》。零舞蹈底子的他，說：「嗰時場場都差唔多淘汰邊緣，之後金晨搵我合作，我俾佢嗰份熱血『撻』番着我。我每日私下練習16個鐘，維持咗4個月。」諾懿在一次練習時受傷導致骨折，負傷上陣的他，最終竟與金晨齊齊奪得冠軍，他憶述說：「冠軍對我嚟講唔重要，最重要係搵番入行時嘅初心，金晨係除咗老婆之外，對我人生好重要嘅女人。」
在人生低潮期，諾懿除了上了人生寶貴一課，亦令他看清圈中真．好友。諾懿與鄭伊健因合作劇集《隨時候命》成為好友，他慶幸在低潮期有伊健陪伴。「有一年我生日加上失戀，佢叫我去佢屋企，由14號玩到16號，不斷叫朋友嚟陪住我，呢啲朋友邊度搵！」諾懿大讚伊健擁有赤子之心：「無論高低起跌，佢對任何人都冇變過，佢成日講『希望要放喺自己度，唔好放喺人哋度』，係我近呢幾年嘅座右銘。」
