黃夏蕙兩個月前突然宣布將與老公潘炳烈移居美國，今早她終於在經理人Simon及契女Amy K送行下，與老公現身機場啟程到美國。
一身綠色套裝裙準備登機的夏蕙姨，面對到場採訪傳媒，不停擺心心手勢送給大家。起飛前夏蕙姨接受《明周》電話訪問，坦言：「好掛住你哋，希望你哋最緊要打針，保持身體好、大家好，疫情過後我就會返嚟！」
夏蕙姨此行第一站是西雅圖，因為女兒在當地生了囡囡，到時會來接她；之後她再去三藩市探望另一個女兒，亦會去溫哥華巡演，開心跟朋友見面，演唱會後有時間正式周遊列國。問到臨別跟粉絲最後說話？她說：「I Love You！我好愛佢哋，好錫佢哋，希望大家保重身體，健健康康，有緣再見！」
夏蕙姨登機前也在社交網留言道別：「原諒今天我要告別了！當大家睇到我呢張相嘅時候，我應該準備起飛，先去台灣，然後轉機去美國。大家唔好掛住我，因為我只係一個傳說，傳說總會過去，不要迷戀我！哈哈！剩下嘅就只有一個個被世人複述嘅故事。希望大家可以做到故事中嘅主角，將呢個傳說發光發亮！有能力嘅朋友，去幫助需要幫忙嘅朋友，冇能力嘅朋友，暫時忍耐，相信仲 （總）有一日，不斷磨練同改進嘅日子下，你都可以成為一個有能力幫助別人嘅人物。再會！」
