由林敏驄、江美儀、鮑起靜、郭柏妍、羅毓儀主演的無綫台慶劇《下流上車族》，昨晚（21日）播出一集繼續大派洋蔥，劇情講到毓霞（鮑起靜飾）與親生仔家寶（林景程飾）再因爭奪狗狗次郎發生爭執，家寶更親揭「要狗唔要媽」真相，原來家寶仔仔太郎因不適應日本生活弄至失眠，嚴重到返唔到學，後來太郎因與次郎視像過後情況好轉。
毓霞聞言後鬧爆家寶是拆散太郎及次郎「真兇」，又斥責他執意移民想法自私，豈料惹怒家寶兼被罵：「我夠想留喺度食大牌檔、講廣東話啦，我老細仲要係我外父，我做錯少少嘢佢成個File車埋嚟，我一樣係適應唔到」、「個個人移民都有自己諗法，細路仔讀書好啲、住嘅地方大啲，全部都係為下一代諗！」家寶愈說愈激動，繼續爆Seed：「阿媽係你自私呀！你樣樣諗自己，淨係想攞番隻狗，你有冇諗過個孫有幾慘，你幾廿歲人有公屋揸手，叫做咩都唔使愁啦！」此時剛巧太郎打電話來，家寶順勢向毓霞「施壓」，毓霞最終屈服並眼泛淚光地說：「你同次郎一齊長大，嫲嫲係唔應該分開你哋。」這場兩母子「爭狗大作戰」十分精彩，景程將扯火鬧阿媽的肉緊演繹到位，聽到阿媽「放狗」後竟展現歡顏，鮑姐的可憐樣更是加分位，該場戲的對白相當貼地兼反映了不少移民家庭的矛盾。
劇中鮑姐與景程有不少對手戲，鮑姐受訪時大讚「阿仔」演得出色：「好多感情戲都係同佢做，同佢合作好舒服，同埋佢現實仲要係物理治療師，仲教咗我好多呢方面知識，我個仔真係好叻！」景程與金像獎影后鮑姐合作，坦言事前十分緊張，但後來才發現擔憂是多餘的，他說：「同鮑姐演戲好舒服，佢唔會俾到任何壓力你，我好多戲都係俾鮑姐喺現場嘅戲帶出嚟，原本我唔expect會咁演。」景程在劇中有不少罵鮑姐的戲分，原來事前都有請教她，「佢叫我唔使諗咁多，放鬆自己，入咗個角色就ok。」他直言很喜歡這個衰仔角色：「話我衰仔最好呀，即係代表個角色有迴響，做演員唔諗咁多嘢嘅，都係跟個劇本盡力做。」
