自爆曾暗戀定欣唔怕老婆嬲　黎諾懿：佢知我鍾意亂講嘢

黎諾懿自爆訓練班時已想追胡定欣。

黎諾懿、胡定欣同是無綫第18期訓練班同學，昨晚齊獲頒20年服務獎。諾懿自爆當年很百厭，試過將大力膠紙貼上臉，被導演發現顧住玩不排戲；定欣記得曾夥拍諾懿演戲考試，諾懿說：「我唔記得啦，相信我考得麻麻，定欣一出道就做女主角，我就行行企企好多年。」

胡定欣當年已被封女神。

定欣認為每人的成長路也不同，她為諾懿做到喜歡的事而高興。她說：「我有日飲咗兩杯，睇到佢主持節目。識佢嗰陣，冇諗過佢廚藝咁叻，仲可以發揮喺工作上。」諾懿回想當日收到定欣幾條各長2、3分鐘的錄音時有點驚喜：「通常收到時間長嘅錄音，都唔係好嘢，她講嘢有啲感觸，原來佢鼓勵我。我保存住錄音，將來搵機會喺節目播出嚟。」

定欣羡慕諾懿成家立室、事業有成，希望自己將來能像他擁有圓滿生活。諾懿被問到可有介紹筍盤給定欣時說：「唔使我介紹，佢有好多選擇。」諾懿自爆讀訓練班時曾喜歡定欣：「我放喺內心深處，一直冇講出嚟。（點解冇追佢？）時機好重要，我當時乜都冇，點敢追女神，就咁樣錯過咗一段美好姻緣。（怕唔怕太太呷醋？）唔怕，佢知我鍾意亂講嘢。」

黎諾懿話唔怕老婆呷醋。