一連兩晚在紅館舉行的《呂方 Classic 40演唱會 》，昨晚（4日）舉行首場，邀得譚嘉儀、杜德偉和黃凱芹擔任表演嘉賓。
呂方演唱過首本名曲《聽不到的說話》 、《只因我太痴 》和《你令我快樂我過》後，便多謝觀眾前來捧場說：「好耐無開過演唱會，心情是又興奮又緊張，我知道有好多星加坡、馬來西亞、台灣、青島等不同地方飛來，好多謝大家今晚冒住生命危險來睇演唱會，因為不用戴口罩，多謝大家咁多年支持我，今晚係疫情後，第一個唔使戴口罩嘅紅館演唱會畀我遇上，開心到鼻涕都流埋。原本個演唱會係三年前開，因疫情取消了，反而撞上入行40年。」他又笑問：「舞台會唔會太高睇唔到，我盡量企前啲，大家知我唔夠高，企太後大家會睇唔到我。今晚我仲準備咗好多跳舞歌，大家隨時可以跳舞、跟著唱歌都得，大家要輕輕鬆鬆，希望大家畀啲唏噓嘅掌聲我聽下做鼓勵。」全場即報以掌聲，還叫他加油。呂方又笑指自己係香港樂壇其中一個好木獨、唱歌企響度唔會郁、又無台風、一碌本咁樣唱了40年，但其實是跟師祖學的，對方唱歌唔會郁但又好好聽，就是關正傑，並唱出對方的《雪中情》、《漁舟唱晚》、《萬水干山縱橫》。
當晚的第一位表演嘉賓譚嘉儀出場和呂方合唱《雪山飛狐》，呂方提到之前是與關菊英（菊姐）合唱，現在是與譚嘉儀，譚嘉儀就問呂方是否滿意她這位「譚姐」？呂方笑道：「當然滿意，你後生咁多…唔係…你靚咁多…都唔係…你青春好多…唉，我點講都錯…都係交個台畀你唱歌」。譚嘉儀形容心情是激動和感恩，因小方邀請自己做嘉賓，令她可以第一次在紅館唱歌，而以小方做稱呼，是第一次見面時，小方要求的，讓她感覺得好親切，稱讚小方唱歌好勁、為人友善、仲對後輩好好。
杜德偉出場時，未有跟呂方合唱，他解釋：「我同呂方太熟，熟到大家可以唔使客氣咁有乜都直接講，呂方傳訊息邀請我做嘉賓時當然好開心，問到合唱什麼歌？他就回答六個字，兩首歌，唔合唱！不過呂方邀請我都好開心，除了可以幫好朋友，仲可以見到好多好耐無見嘅朋友，我做綵排時，有朋友就話咁耐無見點解我高咗，心諗幾十歲仲有得高？後來諗到，因為佢成個星期都對住呂方綵排，見到我就當然會覺得我高；不過唔緊要，呂方有句金句，就係『我雖然冇高度，但有風度』！」最後杜德偉獨唱了兩首歌。至於最後一位表演嘉賓黃凱芹就於安歌環節出場，二人合唱過《情深緣淺》後，呂方落力為黃凱芹今個月中舉行的演唱會宣傳，黃凱芹就稱讚呂方：「今晚你特別靚仔，同幾日前綵排好唔同，瘦咗好多，我有睇你嘅飲食視頻，你好叻煮嘢食，一定有秘方，抵你嘅！」呂方笑道：「抵我肥？」黃凱芹續指瘦身公司好應找呂方合作，幾日時間就可以瘦咁多。
演唱會期間，呂方唱《養你一世》時還於銀幕播出他和太太陪伴女兒的一家三口生活照，相當溫馨幸福，期間還有觀眾向呂方派利是；此外，呂方還有兌現承諾的跳舞，雖然只是稍為「郁動」，但表示已盡了力，笑問觀眾收唔收貨，觀眾即大叫收貨，全晚氣氛熱烈。
