去年5月被環球唱片宣布不再續約，Gin Lee（李幸倪）今年初正式轉會英皇，她說：「我想點樣繼續行呢？我覺得需要一啲新衝擊囉！」新人事新作風，告別舊東家，Gin Lee形容關係如戀人，「你拍咗拖十年，下一步就結婚，一係突然之間會分手，然後下一個半年之內就結婚！」要總結與環球捱不過的「七年之癢」，是因了解而分手嗎？Gin Lee大笑：「可以咁講！」現實生活中，她有個拍拖4年的圈外男友，Gin Lee說，其實每次拍拖都想結婚！
面對前路徬徨，未搵到新公司的處境，Gin Lee坦言不是第一次，上次是14年約滿bma後，整整年多未有着落，「呢個情景，我其實已經第二次經歷，上次真係好驚好驚好驚，當時我仲係新人，我記得我冇晒信心，質疑自己能力、質疑有冇人會賞識我同想簽我；今次好唔同，唔可以話好輕鬆決定，都有好多忐忑同掙扎過程，但因為我經歷過一次，我就會同自己講，冇問題嘅，一定有出路，一定會搵到個更好方向，多咗信心囉！」不要怕、只要信，人生總有出路的。
今次簽約英皇，牽線的人是她事業上的伯樂，就是當年一手發掘她，由馬來西亞帶來香港，參加《超級巨聲2》踢館一炮而紅，再正式簽約bma的「恩人」Raymond。當年的伯樂，如今是英皇唱片部的揸弗人，「佢（Raymond）係其中一個重要人物，十幾年前都係佢邀請我過來香港發展，我第一份約都係同佢簽，兜兜轉轉隔咗幾間公司，又返番嚟同佢合作，都係一個幾奇妙過程。佢開頭搵我，我都話唔好喇，完咗約（環球），我想沉澱下諗清楚，我個人要好長時間去決定一樣嘢，但係once我決定咗，我就會奮不顧身去做，我知道自己性格係咁。」會同泳兒講真話
離開環球，是和平分手還是不歡而散？Gin Lee說：「我覺得都平靜㗎，我同舊公司高層都傾過好多次，開門見山坦承地有好多次討論。其實唔係話有咩分歧，而係你總會知道，去到某一啲位，譬如一段感情，你拍咗拖一段時間，一係下一步就結婚，一係就突然之間會分手，然後下一個半年之內就結婚，我成日都見到呢個情況。你問佢有冇問題，冇咩問題㗎，你同一個人拍咗拖十年，就係覺得行唔到下一個chapter，好感恩大家都有一齊成長，但唔係你下一個階段想要一齊嘅人。我好多朋友都係咁，唔係有大嗌交，但你總會知道要move on囉！」
算是因了解而分開？「哈哈，都可以咁講！我覺得係更加了解自己囉，更加了解自己想要啲咩！」重新出發，Gin Lee全新姿態見人，頭炮《Dum Dum》首次嘗試唱跳歌路，更找來以往在環球多年都冇機會合作的Wyman填詞。當然，面對新公司不少女歌手，自然惹來分薄資源的說法，尤其衝着今年發展不俗的泳兒，「我覺得唔應該咁睇，其實個資源可以愈來愈大，唔係話搶咗邊一個資源。一間公司，唔會去簽兩個一模一樣嘅人返嚟，簽得我返嚟，即係我有自己嘅路啦，其他歌手亦都有其他方向，當你見到身邊其他歌手進步，我就督促自己唔可以留喺原位，所以我覺得良性競爭係好好推動力。」
正如當年在環球，Gin Lee就常傳出與AGA惡鬥，「大家都話我同泳兒點點點，其實我同佢係好好朋友，我都會同佢講真話，有意見會同佢講真話，令大家變得更好，唔係外間覺得係火藥味喎，我哋好多愛㗎，哈哈！我同AGA就係《一加一》開始，認識之後變close，我哋會一齊去做運動、去學泰拳，其實都係朋友，外界見到同我哋真實關係又唔同囉！」圈中女歌手有可以交心的名字？Gin Lee說：「泳兒啦、衛蘭啦，都有一啲朋友可以傾訴嘅！」
知心友隨緣，但家人是一世的。今年除了簽新公司，Gin Lee亦有另一個重要決定，將馬來西亞的家人接來香港定居。「呢一刻佢哋喺馬來西亞兩邊走，始終嗰邊都有物業要打理，但比起以前，會多啲時間喺香港。以前感覺係佢哋過來探我，住一兩個月時間，跟住又返番去佢哋屋企，依家佢哋兩邊都有屋企，我為咗佢哋搬屋，佢哋有自己間房，佢哋唔係嚟旅遊。佢哋過咗嚟之後，我感覺生活完整咗，以前我九成九時間都係歌手身份，我冇機會做其他身份，但係有屋企人喺身邊，我有機會做一個女兒角色，有時候又做下阿妹角色，原來咁多年，我少咗呢樣嘢，依家覺得好圓滿完整。」
與男友好穩定好舒服
有家的感覺，很重要。對來自馬來西亞，2011年隻身來港發展的Gin Lee來說，單打獨鬥了十二年日子，現在終於令她感到有家的感覺，在香港生活並不孤單，經濟條件亦穩定下來。Gin Lee說：「穩定安心好多，其實我想澄清，我唔係住劏房（初來港），我係住一個好細嘅地方，三步路就行晒好細嘅空間，但係依家就舒服好多，有多啲空間可以行下，可以開下窗，有一個露台仔，似返一個正常屋企，至少我容納到我屋企人先，以前好細嘅地方，佢哋嚟探我，嘩，唔知點瞓呀，朋友嚟到都係隨便企，因為冇得坐，得兩個位，依家真係可以有好多位坐，哈哈！」
本月底Gin Lee將會推出第二首派台歌《單戀這件小事》，她有跟填詞人分享自己的單戀故事，「我都有同填詞人（Oscar）分享，我細個都有試過鍾意男仔，都會做一啲估唔到自己會做嘅嘢。其實我細個好男仔頭，我玩田徑跑步，又好鍾意打跆拳道，我唔覺得自己係好細心、好浪漫嘅人，原來當我鍾意一個人，我會變得幾浪漫。（最後有冇一齊？）冇一齊到㗎，佢有鍾意返我，但係最尾都冇開花結果，我覺得係一個好刻骨銘心經歷。」
單戀故事未能開花結果，不過Gin Lee現在的愛情世界卻非常滿足，19年被揭與圈外富貴男友拍拖，進駐半億豪宅同居，雖然男友真身從未曝光，但至今四年，兩人依然甜蜜。說到有米男友，Gin Lee笑說：「傳啫（富貴）！依家處於一個各方面都好穩定、好舒服嘅狀態！」男友何時才正式亮相？「未必（曝光），哈哈！」一於保密到底。今年35歲的Gin Lee，已經認定男友為結婚對象？「我每一次拍拖都以為會結婚，唔係以為，係認為可以結婚，因為我通常會諗長遠啲，我覺得呢個人都幾好，我先會開始一段感情，有啲人就唔係，拍下散拖都OK，但我通常會諗遠啲囉！」諗定就啱！
化妝：NatalieSoo@ndnco
髮型：EveChiu@w work shop
服裝：HELMUT LANG上衣（LANE CRAWFORD）、RICKKY WONG半截裙
場地提供：The Crown@英皇駿景酒店
