邵仲衡、趙慧珊（Aka）和黃溢濠首次為舞台劇《晚安》合體拍攝海報，Aka和黃溢濠親暱拍攝，令溢濠顯得尷尬，拍攝期間邵仲衡仲大叫：「你唔好摸佢！」，令現場氣氛非常搞笑。
事後Aka就自爆「大佬孝」喝止自己摸溢濠，更笑稱對方「硬晒呔」：「其實溢濠佢真係好紳士，每次掂到我都會講聲『我會掂到你條頭髮、我會摸到你膊頭』，所以我叫佢當我男人咁影就得。之後到我主動摸溢濠，就比孝哥叫停喇，因為佢睇晒劇本知道我哋啲關係，叫我點到即止。」Aka表示這部劇為自己度身訂做，多年都被一個夢困擾，「我一個星期都會發同一個夢三、四次，夢境係講我著住校服同老師講再見，起初都覺得懷緬吓，因為都冇機會再著校服啦？到後來係覺得又係呢個夢，都有啲想知夢境有咩含意。」
邵仲衡這次跟Aka、黃溢濠合作，二人稱呼他為「大前輩」，他笑說：「佢哋有咩演戲嘅奇難雜症，都可以搵我傾，我都幾吹得吓。今次喺劇入面，講我賣二手衫，有諗過搵私伙衫做道具，原來角色都比較斯文，啲衫未必好夾。」對於《晚安》的宣傳語句「說一聲晚安，睡一場好覺，發一場好夢。」邵仲衡表示：「我都試過夢境預知未來，當年喺TVB拍劇，一直都冇同梁朝偉合作，但發夢同佢喺餐廳食飯，到咗第二日竟然夢境成真同偉仔同枱食飯。」
至於近期忙於拍攝工作的黃溢濠日夜顛倒，竟忘記日前與Aka同場演出，搞到非常尷尬，「昨晚都係拍通宵，返去抖一抖再嚟呢度開工，影完海報就要再返去拍過，真係隨時都瞓得着。其實我係第一次做舞台劇，最驚就係背對白呢一部份，但係大佬孝叫我放鬆去享受個舞台，所以有咩都會捉住佢攞料㗎喇。雖然呢排好忙，但我都係嫌未夠辛苦，想試吓啲『組接組』嘅滋味。」